Հուլիսի 6-ին Թուրքիայի զինուժը գործողություններ է իրականացրել «Քրդստանի աշխատավորական կուսակցություն» (PKK) զինյալների դեմ Հայաստանին սահմանակից Կարս նահանգի Կաղզվան գավառում:Այս մասին հայտնում է թուրքական պետական «Անադոլու» գործակալությունը:
Վանի Բաշքալե գավառում PKK-ի զինյալները մեքենա են պայթեցրել ժանդարմերիայի մոտ. (արխիվ)
Քրդերի դեմ գործողություններին ներգրավված են Կարս նահանգի անվտանգության գլխավոր տնօրինության (ոստիկանություն) և ժանդարմերիայի ուժերը: Գործողությանն օդից աջակցում է նաև Թուրքիայի օդուժը:
Ըստ թուրքական աղբյուրի՝ գործողությունների արդյունքում սպանվել է PKK-ի 7 զինյալ:
Նույն օրը՝ Թուրքիայի արևելյան Վան նահանգի Բաշքալե գավառում դեռևս երկու օր առաջ թուրք-քրդական բախումներում վիրավորված Թուրքիայի ԶՈւ 2 զինծառայողներից մեկը մահացել է հիվանդանոցում: Այս մասին հայտնում է թուրքական «Հյուրիեթ» պարբերականի կայքը:
Թուրքիայի ուժայինների և քուրդ զինյալների միջև բախումները, երկուստեք կորուստներով, կրկին ինտենսիվացել են 2017-ի գարնանից: Բացի մարդկային կորուստներից, 2 տարի շարունակվող բախումների արդյունքում Թուրքիայի արևելյան և հարավային մի շարք նահանգներ վերածվել են ավերակների: