Հուլիսի 3-ին Մոսուլի հին քաղաքում Իրաքի ոստիկանական ուժերը «Իսլամական պետություն» ահաբեկչական խմբավորումից ազատագրել են Բաբ ալ Սարայի շրջանը, որը Մոսուլում ԻՊ զբաղեցրած վերջին շրջաններից է։ Այս մասին տեղեկացնում է Iraqinews լրատվակայքը։
Միաժամանակ Իրաքի կառավարական բանակը ազատագրել է Խաթունիա և Ռաս ալ-Խուր շրջանները։
Մինչ այդ Իրաքի ոստիկական ուժերի հրամանատարը հայտարարել էր, որ հին քաղաքում ԻՊ ձեռքում են Ալ-Նուջեիֆիի, Ալ Սարայի շրջանները, Լակաշ և Բաբ Ջադիդ շրջանների մի մասը։
#Mosul Old city #Iraq.
300 meters from complete liberation. pic.twitter.com/gD15qsh7SD— Iraqi Day 🇮🇶 (@iraqi_day) July 1, 2017
Հունիսի 29-ին Իրաքի կառավարական բանակը ազատագրել էր Մոսուլի Ան Նուրի Մեծ մզկիթը, որը Մոսուլում «Իսլամական պետության» ամենակարևոր և վերջին հենակետերից մեկն էր։ Մզկիթի գրավումից հետո Իրաքի ՊՆ-ն հայտարարեց, որ Մոսուլն ամբողջովին ազատագրված է։
Մզկիթը խորհրդանշանական էր նաև այն պատճառով, որ այստեղից է 2014-ին ԻՊ ղեկավար Աբու Բաքր ալ-Բաղդադին հայտարարել այսպես կոչված «Իսլամական խալիֆայության» ստեղծման մասին:
Իրաքի վարչապետ Հայդար ալ-Աբադին մզկիթի պայթեցումը ԻՊ կողմից պարտության ընդունում է որակել։
ԻՊ-ից Մոսուլ քաղաքի և հարակից տարածքների ազատագրման գործողությունը Իրաքի կառավարական ուժերը սկսել են 2016-ի հոկտեմբերի 17-ից։ Գործողությանը մասնակցում են Իրաքի կառավարական բանակի, քրդական Փեշմերգե զորաջոկատների մարտիկներ, ինչպես նաև կառավարամետ շիա զինյալներ:
Մոսուլը Բաղդադից հետո մեծությամբ երկրորդ քաղաքն, որը ԻՊ վերահսկողության տակ էր անցել դեռևս 2014-ի հունիսին: