Իրանի իսլամական հեղափոխության պահապանների կորպուսի (ԻՀՊԿ) օդանավակայանների պաշտպանության կորպուսի՝ Թեհրանի «Մեհրաբադ» օդանավակայնում անցկացված զորավարժությանը սպանվել է կորպուսի զինծառայող Մեհդի Յազդին։ Այս մասին տեղեկացնում է RadioFarda ռադիոկայանը։
Զինծառայողը վիրավորվել է զորավարժությանը արձակված կրակոցների ժամանակ, վիրավորվելուց հետո տեղափոխվել է հիվանդանոց, որտեղ էլ հունիսի 27-ին մահացել է։ Զինծառայողի մահվան հանգամանքների մասին այլ մանրամասներ չեն հրապարակվել։
Հունիսի 24-ին Թեհրանի Մեհրաբադ օդանավակայանումմ ԻՀՊԿ պաշտպանության կորպուսը հակաահաբեկչական զորավարժություն էր անցկացրել։
Զորավարժությունը անցկացվել էր «ԻՀՊԿ ստորաբաժանումների մարտական պատրաստության աստիճանը բարձրացնելու և գործողությունների կարողությունը չափելու» նպատակով։
Զորավարժությունը, սակայն, անցկացվել է առանց իրազեկման։ Կրակոցների ձայներ լսելով՝ օդանավակայանում գտնվող մարդկանց մոտ խուճապ է սկսվել։ Զորավարժության նման «անակնկալ» բնույթը մեկնաբանվել է որպես զինծառայողների՝ նմանատիպ պայմաններին ընտելանուն և փորձ ձեռք բերելուն ուղղված քայլ։
Պաշտպանության կորպուսը ԻՀՊԿ ենթակառուցվածքներից մեկն է։ Կորպուսը զբաղվում է կարևոր նշանակության օբյեկտների, բարձրաստիճան պաշտոնյաների անվտանգության ապահովմամբ։
Ունի 3 ստորաբաժանում՝ օդանավակայանների պաշտպանության, բարձրաստիճան պաշտոնյաների պաշտպանության և հոգևոր առաջնորդի պաշտպանության։