Հունիսի 25-26-ը Թուրքիայի արևելյան և հարավարևելյան նահանգներում Թուրքիայի ուժայինների և «Քրդստանի աշխատավորական կուսակցության» (PKK) զինյալների բախումներում սպանվել է 2 զինծառայող, վիրավորվել ևս 3-ը:
Այս մասին հայտնում է թուրքական պետական «Անադոլու» գործակալությունը (1, 2):
Հաքքարի նահանգի մի քանի գավառներ հայտարարվել են անվտանգության հատուկ գոտիներ. (արխիվ)
Հունիսի 26–ին Թուրքիայի արևելյան Էլազիգ նահանգի Քարաքոչանը գավառում «Քրդստանի աշխատավորական կուսակցության» զինյալները կրակել են Թուրքիայի ուժայինների վրա, վիրավորվել է 2 զինծառայող, որոնցից մեկը ավելի ուշ մահացել է հիվանդանոցում:
Հունիսի 25-ին Թուրքիայի հարավարևելյան Հաքքարի նահանգի Չուքուրջա գավառում PKK-ի զինյալները կրակել են Թուրքիայի ուժայինների վրա, ինչի արդյունքում 1 ուժային վիրավորվել և տեղափոխվել է հիվանդանոց, որտեղ էլ ավելի ուշ մահացել է:
Նույնը օրը Թուրքիայի սևծովյան Տրապիզոն նահանգի Մաչկա գավառում PKK-ի զինյալների տեղադրած ինքնաշեն պայթուցիկ սարքը պայթել է Թուրքիայի ժանդարմերիայի զինծառայողների անցման ժամանակ, արդյունքում վիրավորվել է 2 զինծառայող: Այս մասին հայտնում է թուրքական «Հյուրիեթ» պարբերականի կայքը:
Նշենք, որ 2017-ի գարնանից թուրք-քրդական բախումները կրկին ինտենսիվացել են, որոնք ուղեկցվում են երկուստեք մարդկային և նյութական կորուստներով: Ըստ թուրքական պետական «Անադոլու» գործակալության՝ միայն հունիսի 15-22-ի Թուրքիայի արևելյան և հարավարևելյան մի շարք նահանգներում PKK դեմ գործողություններում սպանվել է Թուրքիայի ուժային կառույցների 10 զինծառայող, ևս 36-ը վիրավորվել է, «շարքից հանվել է» քրդական կառույցի 53 զինյալ:
Թուրքիայի ուժայինների և քուրդ զինյալների միջև բախումները վերսկսվել են 2015-ի ամռանից: 2 տարի շարունակվող թուրք-քրդական բախումների հետևանքով Թուրքիայի հարավում և արևելքում մի շարք բնակավայրեր են ավերվել, տեղահանվել է 350-500 հազար մարդ: