Ղազախստանի ԱԳՆ-ն հերքել է Սիրիայի անվտանգության գոտիներում իր ուժերը տեղակայելու վերաբերյալ բանակցելու մասին լուրերը: Այս մասին նշվում է Ղազախստանի ԱԳՆ կայքում:
Երկրի ԱԳՆ-ից հայտնել են, որ Ղազախստանն իր ստորաբաժանումները Սիրիա ուղարկելու վերաբերյալ որևէ մեկի հետ չի բանակցում, իսկ Սիրիայի անվտանգության 4 գոտիների անվտանգություան և արդյունավետության հարցերը դրա երաշխավոր երկրների իրավասության ներքո են:
Ավելի վաղ Թուրքիայի նախագահի խոսնակ Իբրահիմ Քալընը հայտարարել էր, թե Սիրիայի անվտանգության գոտիներում ուժեր տեղակայելու համար Ռուսաստանը առաջարկ է ներկայացրել նաև Ղազախստանին և Ղրղզստանին: Այդ մասին հայտնել էր Reuters լրատվական գործակալությունը, ինչպես նաև մի շարք թուրքական լրատվակայքեր:
Սիրիայում անվտանգության գոտիներ ստեղծելու վերաբերյալ Սիրիայի կառավարությունը և ընդդիմադիր ուժերը պայմանավորվել էին մայիսի 4-ին Աստանայում: Նախատեսվում էր ստեղծել անվտանգության 4 գոտի, սակայն դրանց հստակ սահմանների հարցում այդ ժամանակ դեռ չէին պայմանավորվել:
Անվտանգության գոտիների ստեղծման համաձայնագիր կատարման երաշխավորի դեր ստանձնել էին Թուրքիան, Ռւոսաստանը և Իրանը: