Իրանի իսլամական հեղափոխության պահապանների կորպուսի (ԻՀՊԿ) ցամաքային ուժերը երկրի հարավային Սիսթան և Բելուջիսթան նահանգի Ղասրեղանդ շրջանում ահաբեկչական խումբ են հայտնաբերել։ Այս մասին հունիսի 15-ին հայտնում է իրանական «Ֆարս» լրատվական գործակալությունը։
ԻՀՊԿ ուժերի հետ բախման արդյունքում ահաբեկիչների մի մասը սպանվել կամ վիրավորվել է, իսկ մի մասն էլ դիմել է փախուստի։
Իրանի Հորմոզգան նահանգում «Իսլամական պետություն» ահաբեկչական խմբավորման 4 զինյալներից առգրավված զինամթերքը
Ահաբեկիչներից առգրավվել են պայթուցիկ նյութեր, ավտոմատներ և այլ զինամթերք։
Հունիսի 14-ին Իրանի «Իմամ է զաման» ռազմական հետախուզության ուժերը ահաբեկչական խմբեր են վնասազերծել Սիսթան և Բելուջիստանում ու Քուրդիսթանում։ Հայտնում է իրանական «ԻՌԻԲ» լրատվական գործակալությունը։
Սիսթան և Բելուջիսթանի Չաբահար քաղաքում ձերբակալվել է 5 ահաբեկիչ, սպանվել՝2-ը։ Ահաբեկիչների հետ բախումների արդյունքում սպանվել է «Իմամ է զաման» ռազմական հետախուզության ուժերի մեկ զինծառայող։ Հայտնում է «Թասնիմ» լրատվական գործակալությունը։
Իրանում հունիսի 7-ի Թեհրանի ահաբեկչությունից հետո ահաբեկիչների «որս» է սկսվել։ Ավելի վաղ Սիսթան և Բելուջիսթանում Իրանի ոստիկանական ուժերը ձերբակալել էին «Ջեյշ ալ զոլմ» ահաբեկչական խմբավորման 2 ահաբեկչի, ովքեր 2015 թվականի ապրիլին հարձակվել էին իրանա-պակիստանյան սահմանին հսկողություն իրականացնող իրանցի սահմանապահների վրա, ինչի արդյունքում սպանվել էր 8 սահմանապահ։
Ավելի վաղ Իրանում սպանվել էր «Իսլամական պետություն» ահաբեկչական խմբավորման 4 զինյալ։ Իսկ մինչ այդ հայտնի էր դարձել, որ Իրանի հետախուզության ուժերը հայտնաբերել և վնասազերծել են հունիսի 7-ին Թեհրանում ահաբեկչություն իրականացրած խմբի առաջնորդին, ինչպես նաև խմբին առնչակից մյուս անձանց։
Իրանի հետախուզության նախարարի խոսքերով՝ տարեցտարի ահաբեկչական խմբերը շատանում են Իրանում և այս տարի (իրանական օրացույցով 2017թ. մարտի 21-ից) արդեն ավելի քան 25 ահաբեկչական խումբ է վնասազերծվել։
Հունիսի 7-ին Իրանի մայրաքաղաք Թեհրանում ահաբեկիչները հարձակվել էին խորհրդարանի շենքի և Իմամ Խոմեյնու դամբարանի վրա։ Հարձակումների հետևանքով սպանվել էր 17, վիրավորվել՝ 52 մարդ։ Ահաբեկչության պատասխանատվությունը իր վրա էր վերցրել «Իսլամական պետություն» ահաբեկչական խմբավորումը։ Ահաբեկիչներին աջակցելու և նրանց ուղղորդելու համար Իրանը մեղադրում է ԱՄՆ-ին և Սաուդյան Արաբիային։
Սա «Իսլամական պետության» կողմից Իրանում իրականացված առաջին ահաբեկչությունն էր։ Մինչ այդ Իրանում տեղի ունեցած ահաբեկչական գործողությունները հիմնականում կազմակերպել են երկրում գործող ահաբեկչական, անջատողական խմբավորումները։