Իրանի ոստիկանական ուժերը երկրի հարավային Սիսթան և Բելուջիսթան նահանգում ձերբակալել են «Ջեյշ ալ Զոլմ» ահաբեկչական խմբավորման 2 զինյալի։ Այս մասին հայտարարել է Իրանի սահմանապահ ծառայության հրամանատար Ղասեմ Ռեզային։ Հունիսի 13-ին փոխանցում է իրանական «ԻՌԻԲ» լրատվական գործակալությունը։
Ռեզայիի խոսքերով՝ նրանք այն ահաբեկիչներն են եղել, ովքեր 2015 թվականի ապրիլին հարձակվել էին իրանա-պակիստանյան սահմանին հսկողություն իրականացնող իրանցի սահմանապահների վրա, ինչի արդյունքում սպանվել էր 8 սահմանապահ։
Հիշեցնենք, որ նմանատիպ միջադեպ գրանցվել էր նաև ավելի վաղ։ 2017-ի ապրիլին «Ջեյշ ալ Զոլմ» ահաբեկչական խմբավորման հետ բախումների արդյունքում սպանվել էր 9 իրանցի սահմանապահ։
Իրանում հունիսի 7-ի ահաբեկչական հարձակումներից հետո ահաբեկիչների «որս» է սկսվել։ Ավելի վաղ Իրանում սպանվել էր «Իսլամական պետություն» ահաբեկչական խմբավորման 4 զինյալ։ Իսկ մինչ այդ հայտնի էր դարձել, որ Իրանի հետախուզության ուժերը հայտնաբերել և վնասազերծել են հունիսի 7-ին Թեհրանում ահաբեկչություն իրականացրած խմբի առաջնորդին, ինչպես նաև խմբին առնչակից մյուս անձանց։
Իրանի հետախուզության նախարարի խոսքերով՝ տարեցտարի ահաբեկչական խմբերը շատանում են Իրանում և այս տարի (իրանական օրացույցով 2017թ. մարտի 21-ից) արդեն ավելի քան 25 ահաբեկչական խումբ է վնասազերծվել։
Հունիսի 7-ին Իրանի մայրաքաղաք Թեհրանում ահաբեկիչները հարձակվել էին խորհրդարանի շենքի և Իմամ Խոմեյնու դամբարանի վրա։ Հարձակումների հետևանքով սպանվել էր 17, վիրավորվել՝ 52 մարդ։ Ահաբեկչության պատասխանատվությունը իր վրա էր վերցրել «Իսլամական պետություն» ահաբեկչական խմբավորումը։ Ահաբեկիչներին աջակցելու և նրանց ուղղորդելու համար Իրանը մեղադրում է ԱՄՆ-ին և Սաուդյան Արաբիային։
Սա «Իսլամական պետության» կողմից Իրանում իրականացված առաջին ահաբեկչությունն էր։ Մինչ այդ Իրանում տեղի ունեցած ահաբեկչական գործողությունները հիմնականում կազմակերպել են երկրում գործող ահաբեկչական, անջատողական խմբավորումները։