Մեկ օրվա ընթացքում Սիրիայի հյուսիս-արևմտյան Իդլիբ նահանգի 47 բնակավայր միացել է հրադադարի ռեժիմին: Ընդհանուր առմամբ մինչև այժմ Սիրիայում հրադադարին միացել է Սիրիայի 1619 բնակավայր: Այս մասին հունիսի 14-ին հայտնում է ռուսաստանյան «ՌԻԱ Նովոստի» գործակալությունը՝ հղում անելով ՌԴ ՊՆ-ին:
Սիրիայի իշխանությունները շարունակում են Հալեպ, Դամասկոս, Համա, Հոմս նահանգներում բանակցությունները զինյալների հետ: Հրադադարին միացած զինյալ խմբավորումների թիվը անփոփոխ է — 219 խմբավորում:
Նշենք, որ Իդլիբը այն հիմնական նահանգն է, որտեղ տեղափոխվում են զինյալ խմբավորումները, ովքեր չեն հրաժարվում զենքը վայր դնել:
Հունիսի 9-ին Ռուսաստանի ԶՈւ ԳՇ օպերատիվ վարչության հրամանատար, գեներալ-գնդապետ Սերգեյ Ռուդսկոյը հայտարարել է, որ Սիրիայում «ոչ բախումային» գոտիներ ստեղծելու մասին այս տարվա մայիսին Աստանայում կնքված հուշագրի շնորհիվ վիճակը երկում արմատականորեն փոխվել է:
Ըստ նրա՝ «ոչ բախումային» գոտիների ստեղծումը հնարավորություն է տալիս վերականգնել բնակավայրերը, ենթակառուցվածները և այլն:
Հիշեցնենք, որ մայիսի 4-ին Սիրիայի կառավարության և ընդդիմադիր զինյալ խմբավորումների ներկայացուցիչները ստորագրել են Սիրիայի տարածքում «ոչ բախումային» 4 գոտի ստեղծելու մասին հուշագիր: Դրա երաշխավորներն են Թուրքիան, Ռուսաստանը և Իրանը:
Այս գոտիները ստեղծվելու են Սիրիայի Իդլիբ նահանգում, Լաթաքիայում, Հալեպում և Համայում, Հոմս նահանգի հյուսիսում, Արևելյան Գուտայում, Սիրիայի հարավում՝ Դարաա և Կունեյտրա շրջաններում: