Հունիսի 12-ին Իրանի հարավային Հորմոզգան նահանգի Ռուդան շրջանում Իրանի ոստիկանության ուժերը հայտնաբերել են «Իսլամական պետություն» ահաբեկչական խմբավորման 4 զինյալի։ Զինյալները սպանվել են ոստիկանների հետ բախումների արդյունքում։ Այս մասին հայտնում է իրանական «ԻՍՆԱ» լրատվակա գործակալությունը։
Զինյալների մոտ հայտնաբերվել են պայթուցիկ նյութեր, 112 փամփուշտ և այլ զինամթերք։ Զինյալներից երկուսը իրանցիներ չեն եղել, մյուս երկուսի ինքնությունը դեռ ստուգվում է։
Իրանի Հորմոզգան նահանգում «Իսլամական պետություն» ահաբեկչական խմբավորման 4 զինյալներից առգրավված զինամթերքը
Ավելի վաղ հայտնի էր դարձել, որ Իրանի հետախուզության ուժերը հայտնաբերել և վնասազերծել են հունիսի 7-ին Թեհրանում ահաբեկչություն իրականացրած խմբի առաջնորդին, ինչպես նաև խմբին առնչակից մյուս անձանց։
Իրանի հետախուզության նախարարի խոսքերով՝ տարեցտարի ահաբեկչական խմբերը շատանում են Իրանում և այս տարի (իրանական օրացույցով 2017թ. մարտի 21-ից) արդեն ավելի քան 25 ահաբեկչական խումբ է վնասազերծվել։
Հունիսի 7-ին Իրանի մայրաքաղաք Թեհրանում ահաբեկիչները հարձակվել էին խորհրդարանի շենքի և Իմամ Խոմեյնու դամբարանի վրա։ Հարձակումների հետևանքով սպանվել էր 17, վիրավորվել՝ 52 մարդ։ Ահաբեկչության պատասխանատվությունը իր վրա էր վերցրել «Իսլամական պետություն» ահաբեկչական խմբավորումը։ Ահաբեկիչներին աջակցելու և նրանց ուղղորդելու համար Իրանը մեղադրում է ԱՄՆ-ին և Սաուդյան Արաբիային։
Սա «Իսլամական պետության» կողմից Իրանում իրականացված առաջին ահաբեկչությունն էր։ Մինչ այդ Իրանում տեղի ունեցած ահաբեկչական գործողությունները հիմնականում կազմակերպել են երկրում գործող ահաբեկչական, անջատողական խմբավորումները։
Իրանի Հորմոզգան նահանգում «Իսլամական պետություն» ահաբեկչական խմբավորման 4 զինյալներից առգրավված զինամթերքը