ՀՀ ՊՆ-ն ուսումնասիրում է ինքնասպանությունների կանխարգելման միջազգային փորձը. Ալիկ Ավետիսյան

Հայաստանի պաշտպանության նախարարությունը զինված ուժերում ինքնասպանությունների դեմ պայքարի ոլորտում, բացի ավանդական մեթոդների կիրառումից, ուսումնասիրում է նաև միջազգային փորձը: Այս մասին Ռազմինֆոյի հետ զրույցում նշել է ՀՀ ՊՆ մարդու իրավունքների և բարեվարքության կենտրոնի պետ Ալիկ Ավետիսյանը:

ՀՀ ՊՆ մարդու իրավունքների և բարեվարքության կենտրոնի պետ Ալիկ Ավետիսյանը

ՀՀ ՊՆ մարդու իրավունքների և բարեվարքության կենտրոնի պետ Ալիկ Ավետիսյանը

«Փորձում ենք բոլոր հնարավոր տարբերակներով վերահսկողություն սահմանել, որպեսզի  կարողանանք, թե  գիտական կարողությունների օգտագործմամբ, թե նոր մեթոդների ներգրավվամբ, թե անձնակազմի կարողությունների զարգացման միջոցով ոլորտում որոշակի նորարարական մտքեր ներառել», — հայտնել է Ալիկ Ավետիսյանը:

Ներկայումս ԵԽ-ի հետ առկա է «Մարդու իրավունքների եվրոպական չափորոշիչների ներդրումը ՀՀ զինված ուժերում» ծրագիր, որն առայժմ փորձագիտական քննարկումների մակարդակում է:

«Բայց, ամենայն հավանականությամբ, որոշակի գործնական ուղղություններ էլ կզարգացնենք, միգուցե որոշ փորձագետներ ներգրավենք, որոնց միջոցով կկարողանանք իրականացնել նախկինում գրանցված  դեպքերի ուսումնասիրություն: Զորամասերում ներդրվեն սոցիոմետրիկայի, հետազոտությունների անցկացման հնարավորություններ ընդլայնվեն, հոգեբանների վերապատրաստություններ և այլն», — նշեց կենտրոնի պետը:

Ըստ ՀՀ ՊՆ մարդու իրավունքների և բարեվարքության կենտրոնի պետի՝ «Դիտակետ» ծրագրի շրջանակում պատրաստվում են համապատասխան հարցաթերթեր, որոնք բավականին ծավալուն են և բավականին մեծ ինֆորմացիա և տրամաբանական կապերի շղթա են պարունակում, որոնցով զորացրվող զինծառայողի հետ իրականացվում է «խորին հարցազրույց»:

«Ամենայն հավանականությամբ մենք կներգրավենք բոլորին և չենք սահմանափակվի սոցիոլոգիական որակ ապահովող մի հատվածով, այլ բոլորին հնարավորություն կտանք արտահայտվել», — հայտնեց Ալիկ Ավետիսյանը:

Կենտրոնի պետը նշեց, որ ծրագիրն ամենայն հավանականությամբ իրականացվելու է  մասնագիտացված սոցիոլոգիական կազմակերպության կողմից, արդյունքների հիման վրա կստացվի որոշակի պատկեր զորամասում առկա խնդիրների և դրանց բնույթի մասին:

«Հնարավոր զարգացումները, որ կարող էին տեղի ունենալ, «Դիտակետ» ծրագրի միջոցով հնարավոր կլինի բացահայտել», — նշեց Մարդու իրավունքների և բարեվարքության կենտրոնի պետը:

Նշենք, որ «Դիտակետ» ծրագրի մասին առաջին անգամ ՀՀ պաշտպանության նախարարը հայտնել է զորացրված և ժամկետային զինծառայողների հետ մայիսի 8-ին ՀՀ նախագահ Սերժ Սարգսյանի գլխավորությամբ Արցախում անցկացված հանդիպման ընթացքում:

«Դիտակետ» ծրագրի շրջանակներում բոլոր զորացրված զինծառայողները հնարավորություն կստանան սոցհարցման միջոցով գնահատել զինվորական համակարգը, ծառայության պայմանները, արդյունավետությունը:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *