Հունիսի 9-ին Իրաքի մայրաքաղաք Բաղդադից հարավ գտնվող Մուսայիբ քաղաքի շուկաներից մեկում մահապարտ ահաբեկիչը պայթեցրել է իրեն, ինչի հետևանքով զոհվել է 20, վիրավորվել՝ 34 մարդ։ Այս մասին հայտնում է Al Monitor լրատվակայքը:
Մինչ այդ մեկ այլ ահաբեկչական գործողություն էր իրականացվել Քյարբալա քաղաքում, որի հետևանքով վիրավորվել է 4 մարդ։ Երկու ահաբեկչություններն էլ կազմակերպել է «Իսլամական պետություն» ահաբեկչական խմբավորումը։
Ահաբեկչություն Բաղդադից հարավ գտնվող Մուսայիբ քաղաքում
Ավելի վաղ՝ մայիսի 30-ին, Բաղդադի գլխավոր պողոտաներից մեկում ահաբեկչական պայթյունի հետևանքով սպանվել էր 13 մարդ, ևս 30 մարդ վիրավորվել էր: Պայթուցիկը գործի է դրվել պաղպաղակի խանութներից մեկի մոտ:
Հիշեցնենք, որ հունիսի 7-ին «Իսլամական պետությունը» ահաբեկչություն էր կազմակերպել նաև Իրանում, որի հետևանքով 17 մարդ զոհվել և 50-ից ավելի մարդ վիրավորվել էր։ Ահաբեկչությունը կազմակերպող բոլոր անձինք վնասազերծվել էին։
Վերջին շրջանում Իրաքում և Սիրիայում տարածքները կորցնող իսլամիստները նշում են, որ իրենք թիրախավորել են շիաներին, քանի որ նրանց «հերետիկոսներ» են համարում: ԻՊ-ի անդամները իսլամի սուննի ճյուղին են պատկանում: