Պաշտպանության բանակի հյուսիսային զորամասերից մեկի հրամանատար է նշանակվել գնդապետ Արմեն Գյոզալյանը: Նշանակումներ են կատարվել նաև նրա երկու տեղակալների պաշտոններում:
Զորամասի հրամանատարի պաշտոնում Գյոզալյանի նշանակման մասին shamshyan.com կայքի տեղեկությունը հաստատել է նաև Ռազմինֆոյի աղբյուրը:
Գնդապետ Արմեն Գյոզալյանի՝ մինչ այս ղեկավարած զորամասը 2015 թվականին ճանաչվել է լավագույնը, հայտնում է «Ազատություն» ռադիոկայանի կայքը:
Գնդապետ Արմեն Գյոզալյան. Լուսանկարը՝ «Ազատություն» ռադիոկայանի
Զորամասի հրամանատարի և տեղակալների պաշտոնները թափուր էին մնացել այն բանից հետո, երբ նախկին հրամանատարն ու տեղակալներն հեռացվել էին այդ պաշտոններից:
Մինչ այդ՝ մայիսի 8-ին, պատահարի հետևանքով մահացել էր այդ զորամասի երեք զինծառայող՝ ջրահեղձ լինելով զորամասի հարակից ջրամբարում:
Զինծառայողները զորամասի մեքենաներից մեկով դուրս էին եկել զորամասից, Տոնաշեն գյուղ տանող ավտոճանապարհի 2-րդ կիլոմետրին դուրս էին եկել ճանապարհից ու մեքենայով ընկել էին գետը: Երեք զինծառայողներն էլ մահացել էին: