Այսօր՝ հունիսի 6-ին, Արցախի նախագահ Բակո Սահակյանի հրավիրած խորհրդակցությանը քննարկվել է Արցախի պետական համալսարանում ռազմական գործի դասավանդմանը և այս համատեքստում բուհի և Պաշտպանության բանակի միջև համագործակցությունը: Այս մասին հայտնում է Արցախի նախագահի կայքը:
Ռազմինֆոյի հետ զրույցում Արցախի նախագահի խոսնակ Դավիթ Բաբայանը հայտնեց, որ ծրագիրը դեռ նախնական քննարկումների փուլում է, և կոնկրետ մասնագիտացումները դեռ որոշված չեն:
«Սա դեռևս քննարկման փուլում է, և պետք է համապարփակ ձևով և մանրակրկիտ ծրագիր ներկայացվի: Գործընթացը դեռևս մեկնարկային փուլում է … տարբեր գերատեսչություններ՝ թե պաշտպանության բանակը, թե կրթության նախարարությունը, թե Արցախի պետական համալսարանը պետք է աշխատեն այս ուղղությամբ և ներկայացնեն համապատասխան կարծիքներ, մոտեցումներ, որից հետո ի մի կբերվեն և կլինեն հստակ ուղղությունները և մասնագիտությունները: Եվ ծրագիրը կլինի վերջնական»:
Դավիթ Բաբայանը նշեց, որ տարբեր երկրներում կա այս փորձը, երբ քաղաքացիական բուհերում դասավանդվում է ռազմական գործը, և Արցախի պետական համալսարանում ռազմական գործի դասավանդման կազմակերպումը հենց նման փորձի ներդրում է:
Ավելացնենք, որ ներկայում Հայաստանում գործում է 3 բարձրագույն ռազմակրթական հաստատություն.
- Վ. Սարգսյանի անվան ռազմական համալսարան (մասնագիտացումները՝ մոտոհրաձիգներ, հրետանավորներ և այլն),
- Ա. Խամփերյանցի անվան ռազմական ավիացիոն համալսարան (մասնագիտացումները՝ օդաչուներ, կապի և ՌէՊ մասնագետներ և այլն),
- Պաշտպանական ազգային հետազոտական համալսարան:
Սրանից բացի, հայաստանցի կուրսանտները ռազմական կրթություն են ստանում նաև Ռուսաստանում, Հունաստանում և մի շարք այլ երկրներում: