ՆԱՏՕ-ի անդամ մի քանի երկիր Գերմանիայի, Ֆրանսիայի, Դանիայի և Նիդեռլանդների գլխավորությամբ դեմ են 2018 թվականի ՆԱՏՕ-ի գագաթնաժողովը Ստամբուլում անցկացնելուն։ Այս մասին մայիսի 31-ին տեղեկացնում է գերմանական Die Welt թերթի պաշտոնական կայքը։
ՆԱՏՕ-ի բարձրաստիճան պաշտոնյաներից մեկի խոսքերով՝ ՆԱՏՕ-ն չի ցանկանում ամրապնդել Թուրքիայի միջազգային դիրքերը և տպավորություն ստեղծել, թե աջակցում է Թուրքիայի կառավարության ներքին քաղաքականությանը։
ՆԱՏՕ-ի գագաթնաժողով (արխիվ)
Եվրամիության անդամ 18 երկիր, ինչպես նաև Կանադան կողմ են, որ գագաթնաժողովը անցկացվի Բրյուսելում։ Հարցի առնչությամբ վերջնական որոշում կկայացվի հունիսին՝ ՆԱՏՕ անդամ երկրների պաշտպանության նախարարների հանդիպման ժամանակ։
ՆԱՏՕ-ի 2018 թվականի գագաթնաժողովը Թուրքիայում անցակացնելու առաջարկը արել էր Թուրքիայի նախագահ Ռեջեփ Թայիփ Էրդողանը՝ ՆԱՏՕ-ի 2016թ. գագաթնաժողովի ժամանակ։
Նշենք, որ վերջին շրջանում բավականին լարվել են Գերմանիայի և Թուրքիայի հարաբերությունները։ 2017-ի մայիսին Գերմանիան նախնական քաղաքական ապաստան տրամադրեց Թուրքիայի ԶՈւ զինծառայողների և նրանց ընտանիքներին, ովքեր Թուրքիայում մեղադրվում են 2016 թ. հուլիսի ռազմական հեղաշրջման փորձին ներգրաված լինելու համար:
Գերմանիայի այս քայլից հետո Թուրքիան արգելեց գերմանացի պատգամավորներին այցելել «Ինջիրլիք» ավիաբազայում ծառայություն իրականացնող Գերմանիայի ԶՈւ զինվորականներին: Այժմ Գերմանիան քննարկում է իր ստորաբաժանումը Թուրքիայից այլ երկիր տեղափոխելու հարցը։
Իր հերթին Թուրքիան հայտարարում է, որ Գերմանիան չի կարող Թուրքիային սպառնալ «Ինջիրլիքի» ռազմաբազայից զորքերի դուրսբերումով և եթե ցանկանում է դուրս բերել զորքերը, ապա Թուրքիան չի համառի։
Ըստ Թուրքիայի արտգործնախարար Մևլյութ Չավուօղլուի՝ գերմանացի պատգամավորների այցը բազա հնարավոր չէ, սակայն Թուրքիան ապագայում կարող է հարցը վերանայել, եթե «Գերմանիան դրական քայլեր ձեռնարկի»։
Թուրքիայում գերմանական ստորաբաժանումը թողնելու կամ այնտեղից տեղափոխելու հարցը վերջնականորեն պարզ կլինի հունիսի կեսերին:
Գերմանացի օդաչուները Ինջիրլիք ավիաբազայում. նկարը՝ «Ասոշեյթիդ պրես»-ի, 15/12/2015