Մայիսի 31-ին Ադրբեջանի նախագահ Իլհամ Ալիևը ստորագրել է 2017-ի հուլիսի 1-ից մինչև 30-ը Ադրբեջանի քաղաքացիների պարտադիր զինվորական ծառայության զորակոչվելու և ժամկետային զինծառայությունն ավարտած զինծառայողներին պահեստազոր զորացրելու մասին հրամանագիրը:Այս մասին հայտնում է Ադրբեջանի նախագահի կայքը:
Ադրբեջանի ԶՈւ զինծառայողներ
Հրամանագրի համաձայն՝ 2017-ի հուլիսի 1-30-ը ծառայության են զորակոչվելու 1999 թվականին ծնված Ադրբեջանի այն քաղաքացիները, որոնց 18-ամյակը պետք է լրացած լինի մինչև զորակոչման օրը՝ ներառյալ նաև զորակոչման օրը:
Զորակոչման են ենթակա նաև մինչև 35 տարեկան այն քաղաքացիները, որոնք դեռևս չեն անցել պարտադիր զինվորական ծառայություն կամ չեն ազատվել Ադրբեջանի բանակում կամ այլ զինվորական կազմավորումներում ծառայությունից:
Ադրբեջանում ժամկետային զինծառայության տևողությունը 18, իսկ բարձրագույն կրթություն ունեցողների համար՝ 12 ամիս է։ Զորակոչային տարիքը սահմանված է մինչև 35 տարեկան։ Երկրի նախագահի հրամանագրով զորակոչ անցկացվում է տարեկան 4 անգամ՝ հունվար, ապրիլ, հուլիս և հոկտեմբեր ամիսներին։
Նշենք, որ ադրբեջանցի երիտասարդները զորակոչվում են
- բանակ,
- սահմանապահ պետական ծառայություն,
- արտակարգ իրավիճակների ծառայություն,
- ներքին զորքեր,
- պետական հատուկ պահպանության ծառայություն,
- արդարադատության նախարարության քրեակատարողական վարչություն: