Հարավային Կորեայի նորընտիր նախագահ Մուն Չժե Ինը կարգադրել է հետաքննություն սկսել և պարզել, թե ինչպես է առանց իշխանությունների թույլտվության երկրում հայտնվել ամերիկյան THAAD հակահրթիռային համալիրների արձակման 4 կայան։ Այս մասին մայիսի 30-ին տեղեկացնում է կորեական «Yonhapnews» լրատվական գործակալությունը։
Ըստ գործակալության՝ կառավարությունը թույլատրել է միայն THAAD-ի արձակման 2 կայանի տեղակայումը։ Սակայն հետագայում պարզվել է, որ մատակարարվել է արձակման ևս 4 կայան։
Հարավային Կորեայի նախագահը հեռախոսազրույց է ունեցել նաև երկրի պաշտպանության նախարարի հետ։ Վերջինս հայտնել է, որ մատակարարումից տեղյակ է եղել։
ԱՄՆ-ն և Հվ. Կորեան Հյուսիսային Կորեայի միջուկային ծրագրին դիմակայելու համար THAAD հակահրթիռային համալիրների տեղակայման հարցի շուրջ համաձայնության եկել են 2016-ի հուլիսին՝ Կորեայի նախորդ կառավարության օրոք։
Համալիրը նախատեսվում էր մատակարարել 2018-ին, սակայն, պայմանավորված Հս. Կորեայի հրթիռային փորձարկումներով, THAAD-ի բաղադրիչների մատակարարումները ԱՄՆ-ն սկսել է մարտին։ Համալիրը կառավարելու են ամերիացիները։
Կորեայում նախատեսվում է տեղակայել մեկ մարտկոց։ Համակարգի մեկ մարտկոցը բաղկացած է 6-9 արձակման կայանից։
Համաձայնագիրը առաջացրել էր Ռուսաստանի և Չինաստանի դժգոհությունը։