Մայիսի 27-ին Իրանի հյուսիսարևմտյան Արևմտյան Ադրբեջան (Ատրպատական) նահանգում PJAK-ի (քրդ. Partiya Jiyana Azad a Kurdistanê, «Քուրդիստանի ազատ կյանքի կուսակցություն») զինյալների հետ բախումների հետևանքով սպանվել է Իրանի սահմանապահ ծառայության 2 զինծառայող, ևս 5-ը վիրավորվել են։
Այս մասին տեղեկացնում է իրանական «Թասնիմ» լրատվական գործակալությունը։
Սպանված սահմանապահներն են՝ մայոր Մոհամադռեզա Ֆիրուզին, ենթասպա Մոհամադռեզա Ֆարահին։
Իրանի Արևմտյան Ադրբեջան նահանգի սահմանապահ ծառայության հրամանատար, բրիգադային գեներալ Ղասեմ Ռեզայիի խոսքերով ՝ միջադեպի համար պատասխանատվություն պետք է կրի Թուրքիան։
Իրանի ԱԳՆ խոսնակ Բահրամ Ղասեմին էլ հայտարարել է, որ միջադեպի առնչությամբ Իրանն արդեն դիմել է Թուրքիային և սպասում է արձագանքի։
Հիշեցնենք, որ ավելի վաղ՝ 2016-ի հոկտեմբերին, Քուրդիստան նահանգի Մարիվանի շրջանի Գոլչինար գյուղի մոտ Իրանի իսլամական հեղափոխության պահապանների կորպուսը (ԻՀՊԿ) վնասազերծել էր PJAK-ի զինյալների։ Ահաբեկիչները փորձել էին հատել իրանա-իրաքյան սահմանը։
PJAK-ը Իրանում ստեղծված (2003թ) քրդական կազմակերպություն է: Ղեկավարվում է PKK-ի կողմից: Գործում է հիմնականում Իրանի Քուրդիստան, Արևմտյան Ադրբեջան և Քերմանշահ նահանգներում:
Կառույցի ռազմական թևը կոչվում է HRK (քրդ. Hêzên Rojhilata Kurdistan, «Արևելյան Քուրդիստանի ինքնապաշտպանություն»): Վերջինս 2004 թվականից Իրանում քրդական ազգային ինքնավարություն ստեղծելու համար բախումների մեջ է իրանական իշխանությունների հետ:
Հավելենք, որ Թուրքիան «Քրդստանի աշխատավորական կուսակցության» (PKK) դեմ պայքարի շրջանակներում պատրաստվում է Իրանի հետ սահմանի երկայնքով ևս պատ կառուցել: