Մայիսի 24-ին Լիբանանում Հայաստանի դեսպան Սամվել Մկրտչյանը հանդիպել է այդ երկրի զինված ուժերի հրամանատար, գեներալ Ժոզեֆ Աունի հետ։ Այս մասին տեղեկացնում է Լիբանանի ազգային լրատվական գործակալությունը։
Կողմերը քննարկել են միջազգային, տարածաշրջանային իրադրությանը, ինչպես նաև երկու երկրների զինված ուժերի համագործակցությանը վերաբերող հարցեր։
Ավելի վաղ հայտնի էր դարձել, որ Հայաստանը և Լիբանանը քննարկում են երկկողմ ռազմատեխնիկական համագործակցության պայմանագրի կնքումը, որով հայաստանցի մասնագետները կօգնեն բարձրացնել Լիբանանի բանակի մարտունակությունը:
Մինչ այդ՝ փետրվարի 10-ին, Լիբանանում ՀՀ դեսպան Սամվել Մկրտչյանը հանդիպել էր Լիբանանի պաշտպանության նախարար Յակուբ Սարաֆի հետ, ում հետ քննարկել էր Հայաստանի և Լիբանանի միջև ռազմական համագործակցության վերաբերյալ համաձայնագրի նախագծի համաձայնեցման ընթացքը:
Նշենք նաև, որ 2014 թվականի նոյեմբերից Լիբանանում խաղաղապահ առաքելության է մասնակցում նաև ՀՀ ԶՈւ խաղաղապահ ուժերի մեկ դասակ՝ 32 զինծառայողով: