Անհրաժեշտության դեպքում ԱՊՀ միավորված ՀՕՊ համակարգի ուժերը կավելացվեն

ԱՊՀ միավորված հակաօդային պաշտպանության համակարգի ուժերն ու միջոցները բավարար են, սակայն անհրաժեշտության դեպքում կարող են նաև ավելացվել: Այս մասին հայտարարել է ԱՊՀ պաշտպանության նախարարների խորհրդին կից ՀՕՊ հանձնաժողովի նախագահ Վիկտոր Բոնդարյովը: Փոխանցում է ռուսաստանյան «ՌԻԱ Նովոստի» գործակալությունը:

Պաշտոնյան հայտարարել է, որ ԱՊՀ միավորված ՀՕՊ համակարգի մեջ ներառված են.

• ավիացիոն 19 զորամաս,
• զենիթահրթիռային զորքերի 38 զորամաս,
• ռադիոտեխնիկական զորքերի 15 զորամաս,
• ՀՕՊ 9 բրիգադ,
• ՌԷՊ 3 զորամաս:

Հակաօդային պաշտպանության ուժերի նման կազմը որոշվել է ԱՊՀ պաշտպանության նախարարների խորհրդի՝ 2015թ. դեկտեմբերի որոշումներից մեկով: Այս մասին նշելով՝ պաշտոնյան հայտարարել է, որ անհրաժեշտության դեպքում ԱՊՀ միավորված ՀՕՊ համակարգի ուժերն ու միջոցները կարող են համալրվել:

Նշենք, որ ԱՊՀ միավորված ՀՕՊ համակարգի նպատակը կազմակերպության տարածքում հակաօդային պաշտպանությունը համատեղ ուժերով ապահովելն է: Այս համակարգին անդամակցում են ՀԱՊԿ անդամ 6 պետությունները, ներառյալ Հայաստանը, ինչպես նաև ՀԱՊԿ-ին այլևս չանդամակցող Ուզբեկստանը:

ԱՊՀ ՀՕՊ համակարգի շրջանակներում տարեկան մեկ անգամ Ռուսաստանում անցկացվում է «Մարտական ընկերակցություն» ՀՕՊ զորավարժությունը, որին մասնակցում է նաև Հայաստանը: 2017 թվականին այդ զորավարժությունն անցկացվելու է սեպտեմբերին, և դրա կազմակերպման նպատակով օրերս Ռուսաստան է մեկնել ՀՀ ԶՈւ պատվիրակությունը: