Սաուդյան Արաբիան ստեղծել է ռազմաարդյունաբերական ընկերությունների նոր միավորում՝ «Սաուդյան Արաբիայի ռազմարդյունաբերություն» անվանումով, որը 2030 թ. հեռանկարներով պետք է 3,7 մլրդ ԱՄՆ դոլարի ներդրում ունենա թագավորություն ՀՆԱ-ում:
Այս մասին հայտնել է Սաուդյան Արաբիայի պետական լրատվական գործակալությունը:
Սաուդյան Արաբիայի արտադրության Saqr 1 անօդաչու սարքը
Ընկերությունը ստեղծվել է երկրի պետական «Հանրային ներդրումների հիմնադրամի» ծրագրով: Հիմնադրամի միջոցներից շուրջ 170 մլն դոլար պետք է ուղղվի հետազոտական աշխատանքներին: Նշվում է, որ ընկերության ստեղծմամբ կլուծվի նաև աշխատատեղերի խնդիր՝ ավելացնելով դրանք շուրջ 40.000-ով:
Ընկերությունը գործելու է հիմնական 4 ուղղություններով.
- Ռազմաօդային համակարգեր. ներառում է ռազմաօդային ուժերի տեխնիկայի վերանորգում, ԱԹՍ-ների վերանորոգում և արտադրություն:
- Ցամաքային համակարգեր. ներառում է զինտեխնիկայի վերանորոգում և արտադրություն:
- Զենքեր և հրթիռներ, ներառում է նաև ռազմամթերքի արտադրություն:
- Ռազմական էլեկտրոնիկա. ներառում է ռադարների, սենսորների, կապի միջոցների և ՌԷՊ համակարգերի արտադրություն:
Նշվում է, որ ծրագիրը նպատակ ունի նաև թևթևացնել նավթի եկամուտներից Սաուդյան Արաբիայի կախվածությունը և զարգացնել տեղական արտադրությունը:
Սաուդյան Արաբիան արդեն հայտարարել է սեփական Saqr-1 մարտավարական, հարվածային ԱԹՍ-ների պատրաստման մասին:
Նշենք, տեղական արտադրանքը զարգացնելուն զուգահեռ, մայիսի 20-ին Սաուդյան Արաբիան ԱՄՆ-ի հետ ստորագրել է սպառազինության ներկրման խոշոր գործարք՝ 110 մլրդ դոլար արժողությամբ: