Ռուսաստանի պաշտպանության նախարարությունը միջոցներ է հատկացրել «Տիգր» զրահամեքենայի նոր տարբերակի ստեղծման փորձակոնստրուկտորական աշխատանքների համար:
Մեքենայի նոր տարբերակի առաջին օրինակը նախատեսվում է թողարկել 2018-ին: Այս մասին «ՏԱՍՍ» գործակալության հետ հարցազրույցում մայիսի 16-ին հայտարարել է մեքենաներն արտադրող «ՎՊԿ» ընկերության գլխավոր տնօրեն Ալեքսանդր Կրասովիցկին:
ՀՀ ԶՈւ «Տիգր» զրահամեքենան՝ 2011 թ. Երևանի զոհահանդեսի ժամանակ
Կրասովիցկին հայտնել է, որ զրահամեքենայի նոր տարբերակը ունենալու է V տիպի հատակ և ավելացված բեռնատարողություն, իսկ անձնակազմի և դեսանտի տեղակայումը կլինի ավելի հարմար: Մեքենան կստանա նաև ընդհանուր տեխնիկական պահանջների երկրորդ և երրորդ, հեռանկարում՝ չորրորդ դասի պաշտպանություն:
Դեռևս 2016-ի հուլիսին «ՎՊԿ» ընկերության ներկայացուցիչը հայտնել էր, որ նախատեսվում է մեքենան դարձնել դեսանտավորվող, դեսանտավորման փորձարկումներն ընթացքում էին:
2017-ի փետրվարին Հայաստանի և Ռուսաստանի միջև կնքված 200 միլիոն դոլարի պայմանագրով ձեռքբերվելիք սպառազինության ցուցակի մեջ առկա են նաև «Տիգր» զրահամեքենաներ:
Նշենք, որ Հայաստանի զինված ուժերում և ոստիկանության զորքերում ներկայում էլ կան «Տիգր» զրահամեքենաներ: Զինված ուժերի կազմում առկա մեքենաները ցուցադրվել են 2011 թվականի Երևանի ԶՈւ զորահանդեսին:
ՀՀ ոստիկանության զորքերի «Տիգր» զրահամեքենան Մեծամորի ատոմակայանում զորավարժության ընթացքում
Զրահամեքենան արտադրվում է 2005 թվականից, նախատեսված է ճանապարհներով և դրանցից դուրս մարդկանց և բեռների փոխադրման համար: Հաշվարկված է 4 մարդու և մինչև 1500 կգ բեռի փոխադրման համար: