Գերմանիայի կառավարությունը կքննարկի Սիրիայում և Իրաքում ԱՄՆ գլխավորած միջազգային կոալիցիայի գործողություններում ՆԱՏՕ-ի մասնակցության վերաբերյալ ԱՄՆ առաջարկը:
Այս մասին հայտնել է Գերմանիայի ԱԳՆ պաշտոնական ներկայացուցիչ Մարտին Շեֆերը. փոխանցում է «ՏԱՍՍ» լրատվական գործակալությունը:
Շեֆերը նշել է, որ ներկայում իրավիճակը փոխվում է ոչ միայն ԱՄՆ-ում Թրամփի նոր վարչակարգի հետ կապված, այլև Սիրիայի և Իրաքի դրությամբ պայմանավորված: Նա նաև նշել է, որ այդ հարցի հետ կապված որոշումը կկայացվի մայիսի 25-ին Բրյուսելում կայանալիք ՆԱՏՕ-ի գագաթնաժողովում:
Գերմանիայի ԱԳՆ ներկայացուցիչը մասնավորապես հայտնել է.
Վստահ եմ, որ մայիսի 25-ին մենք կկայացնենք միասնական որոշում, որը ցույց կտա ՆԱՏՕ-ի միասնականությունը:
ՆԱՏՕ-ի վաղ նախազգուշացման և վերահսկման օդային համակարգերով (AEWAC) սպառազիված Boeing E-3 ինքնաթիռ
Նշենք, որ ավելի վաղ՝ փետրվարի 16-ին, ՆԱՏՕ-ի գլխավոր քարտուղար Յենս Ստոլտենբերգը հայտարարել էր, որ Սիրիայում ընթացող պատերազմին ՆԱՏՕ-ի մասնակցությունը սահմանափակվում է միայն ԱՄՆ գլխավորած կոալիցիայի գործողություններին օդային վաղ նախազգուշացման և վերահսկման օդային համակարգերով սպառազինված ինքնաթիռների (AWACS) կիրառմամբ:
Նախորդ տարվա հոկտեմբերի 12-ին էլ Գերմանիայի կառավարությունը որոշել էր ՆԱՏՕ-ի վաղ նախազգուշացման և վերահսկման օդային համակարգերով սպառազինված ինքնաթիռների (AWACS) անձնակազմը համալրել Գերմայիայի ԶՈւ նոր զինծառայողներով: