Պաղեստինյան ՀԱՄԱՍ խմբավորումը մշակել է իր քաղաքականության նոր գլխավոր սկզբունքներ, որոնցում ավելի մեղմացել են հակահրեական շեշտադրումները և ավելի կոմպրոմիսային են:
Հրապարակված փաստաթղթում 46 կետով ներկայացված են կազմակերպության նպատակները, արաբա-իսրայելական խնդրի շուրջ իրենց մոտեցումները և սկզբունքները:
Նոր փաստաթղթի առաջին կետով հաստատվում է, որ ՀԱՄԱՍ-ը պաղեստինյան շարժում է, որի նպատակը «Պաղեստինի ազատագրումը և հակասիոնական պայքարն է»:
Ի տարբերություն նոր փաստաթղթի՝ կազմակերպության 1988 թ-ի սկզբունքների և գործողությունների մասին փաստաթղթում ՀԱՄԱՍ-ը հանդես էր գալիս որպես «Մուսուլման եղբայրներ» կազմակերպության ճյուղերից մեկը:
Այս առիթով ՀԱՄԱՍ-ը իր թվիթթերի միկլոբլոգում հայտնել էր, որ ՀԱՄԱՍ-ը կիսում է «Մուսուլման եղբայրների» գաղափարները, սակայն նա լիովին անկախ պաղեստինյան կազմակերպություն է:
Khaled Mashaal: Hamas shares the Muslim Brotherhood ideology, but it's a completely independent Palestinian organization. pic.twitter.com/N09SqGGxM4
— Hamas Movement (@HamasInfoEn) May 1, 2017
«Մուսուլման եղբայրներից» իրենց անկախության ամրագրումը կարող է ուղղված լինել Եգիպտոսի հետ հարաբերությունների սերտացմանը, քանի որ 2013-ի հուլիսի 3-ին Եգիպտոսում իշխանությունից հեռացվել էր «Մուսուլման եղբայրների» ներկայացուցիչ նախագահ Մուհամմեդ Մուրսիին:
Նոր սկզբունքներով ՀԱՄԱՍ-ը մեղմացրել է նաև հակահրեական շեշտադրումները: Նոր փաստաթղթի 16-րդ կետում նշվում է, որ ՀԱՄԱՍ-ի հակամարտությունը ոչ թե հրեաների հետ է, այլ «սիոնիստական» ծրագրի:
Ի տարբերություն նոր փաստաթղթի՝ կազմակերպության 1988 թ-ի սկզբունքների և գործողությունների մասին փաստաթղթի 28-րդ հոդվածում ՀԱՄԱՍ-ը թշնամի էր համարում նաև հրեաներին:
Նոր փաստաթղթում ՀԱՄԱՍ-ը կոմպրոմիսային մոտեցում ունի նաև տարածքային պահանջների հարցում: Մասնավորապես՝ նոր փաստաթղթի 20-րդ կետում սահմանվում է Պաղեստինի անկախության և ինքնիշխանության վերականգնումը մինչև 1967 թ Վեցօրյա պատերազմի տարածքներում՝ Երուսաղեմ մայրաքաղաքով: Այդ տարածքները ստորև ներկայացված են նկարի երրորդ հատվածում:
Այսպիսի դրույթ ուներ նաև 2015-ին Իսրայելին ուղղված երկարատև խաղաղություն հաստատելու առաջարկների փաթեթին:
ՀԱՄԱՍ-ի քաղաքականության նոր գլխավոր սկզբունքների վերաբերյալ Իսրայելի վարչապետի խոսնակ Դեյվիդ Քեյեսը հայտնել է, որ «ՀԱՄԱՍ-ը փորձում է հիմարացնել աշխարհին, բայց դա չի հաջողվի»:
2015-ին ՀԱՄԱՍ-ն Իսրայելին երկարատև խաղաղություն հաստատելու առաջարկների փաթեթ է փոխանցել, որտեղ ներառված են այն պարտավորությունները, որոնք ՀԱՄԱՍ-ը կստանձնի, եթե Գազայի հատվածն ապաշրջափակվի։