Աբխազիայում տեղակայված Ռուսաստանի զինված ուժերի հարավային ռազմական շրջանի ենթակայության տակ գործող ռազմաբազայի ստորաբաժանումները 2017 թ. ընթացիկ 5 ամսվա ընթացքում անցկացրել են ռազմական տեխնիկայի վարման շուրջ 300 վարժանք և պարապմունք, 500 կրակային վարժանք: Այս մասին հայտնում է «ՌԻԱ Նովոստի» գործակալությունը:
Ռազմաբազայի զինծառայողները զինտեխնիկան վարել են լեռնային վայրերում՝ այդ ընթացքում հաղթահարելով շուրջ 50 հազար կմ:
Բացի այդ, ընթացիկ տարում ռազմաբազայի զինծառայողները իրականացրել են մարտական կրակի վարման շուրջ 500 վարժանք և պարապմունք:
Այդ թվում՝ ռուսաստանյան ռազմաբազայի զինծառայողները կրակել են ԲՏՌ-82Ա զրահափոխադրիչների, Տ-72Բ3 տանկերի բազային զենքերով, «Գրադ» համազարկային կրակի ռեակտիվ համակարգերով, 120 մմ տրամաչափի ականանետներով և 122 մմ տրամաչափի Դ-30 հաուբիցներով:
Վարժանքներն անցկացվել են «Գուդաուտա», «Նագվալոու» և «Ցաբալ» զորավարժարաններում: Բացի այդ, զորավարժությունների մի մասն էլ անցկացվել են Աբխազիայի տարածքից դուրս՝ Կրասնոդարի «Մոլկինո» զորավարժարանում: