Թուրքական Target ընկերությունը 2016 թ. Ադրբեջանի պաշտպանության նախարարությանը միջնորդավորված ձևով վաճառել է նոր նորվեգական KONGSBERG Target Systems ընկերության արտադրության ուսումնական թիրախներ: Թուրքական ընկերությունը համապատասխան հաղորդագրություն է տարածել իր կայքում:
Նշված հաղորդագրությունից պարզ է դառնում, որ նույն ընկերությունը 2012-16 թթ. ընթացքում Ադրբեջանի պաշտպանության, ներքին գործերի նախարարություններին, պետական սահմանապահ, ազգային անվտանգության ծառայություններին մատակարարել է հրաձգարանների համար նախատեսված ուսումնական թիրախներ, հավաքել է տարբեր տեսակի հրաձգարաններ:
Մասնավորապես Ադրբեջանի ՆԳՆ ներքին զորքերին մատակարարվել են շարժական «իջնող-բարձրացող» թիրախներ: Իսկ 2015 թ. Ադրբեջանի պետական սահմանապահ ծառայությունը թուրքական ընկերությունից, կամ ընկերության միջնորդությամբ, գնել է 2000, 1000, 500, 300, 100, 25 մետրանոց հրաձգարաններ:
Թուրքական ընկերությունը 2012 թ. այն ժամանակ դեռևս Ադրբեջանի ազգային անվտանգության նախարարության* համար հավաքել էր 25 մետրանոց ատրճանակային փակ հրաձգարան:
Նորվեգական արտադրության ուսումնական թիրախ-համակարգ
*2015 թ. հոկտեմբեր-նոյեմբեր ամիսներին Ադրբեջանի ազգային անվտանգության նախարարությունը լուծարվել է, իսկ նույն թվականի դեկտեմբերից վերջինիս հիմքի վրա ստեղծվել է երկու առանձին կառույց՝
- Պետական անվտանգության ծառայություն,
- Արտաքին հետախուզական կազմակերպություն: