Ապրիլի 24-ին Ուկրաինայի ազգային անվտանգության և պաշտպանության խորհրդի քարտուղարի առաջին տեղակալ Օլեգ Գլադկովսկին այցելել է Ադրբեջան և հանդիպել այդ երկրի փոխվարչապետ Յագուբ Էյուբովին, ով կարգավորում է Ադրբեջանի ռազմարդյունաբերական ոլորտը: Այս մասին հայտնում է ուկրաինական գերատեսչության կայքը:
Ուկրաինական արտադրության Ան-178 ռազմական բեռնատար ինքնաթիռ
Կողմերը քննարկել են երկու երկրների ռազմատեխնիկական համագործակցությանը վերաբերող հարցեր: Օլեգ Գլադկովսկին ադրբեջանցի պաշտոնյայի հետ հանդիպմանը նշել է, որ կողմերը «կարող են զարգացնել համակործակցությունը ռազմական արդյունաբերության, մասնավորապես՝ ավիաշինության ոլորտում»:
Ուկրաինացի պաշտոնյան մասնավորապես ասել է, որ «կողմերը ունեն բոլոր հնարավորությունները թե՛ ներքին շուկաների, թե՛ արտահանման նպատակով համատեղ նախագծեր իրականացնելու համար»:
Հիշեցնենք, որ 2015 թ. մայիսին «Ադրբեջանական ավիաուղիներ» քաղաքացիական ընկերությունը և ուկրաինական «Անտոնովը» մստորագրել էին Ադրբեջանին 10 միավոր Ան-178 ռազմական բեռնատար ինքնաթիռ մատակարարելու պայմանագիր: Սակայն մինչ օրս պայմանագրով նախատեսված ինքնաթիռների հավաքման գործընթացը չի ավարտվել:
Ադրբեջանական ավիաուղիների նախագահ Ջահանգիր Ասկերովը և «Անտոնովի» նախագահ Միխայիլ Գվոզդևը՝ Ան-178 ինքնաթիռի մոտ
Ադրբեջանական կողմի պնդմամբ՝ 2018 թ. պայմանագրով նախատեսված առաջին երկու ինքնաթիռները ստանալուց հետո, մնացած ինքնաթիռները նախատեսվում է արտադրել Ադրբեջանում։ Սակայն «Անտոնովի» նախագահ Միխայիլ Գվոզդևը 2016 թ. հայտնել էր, որ խոսքը միայն հավաքման մասին է, և որևէ տեխնոլոգիա Ադրբեջանին չի փոխանցվելու:
Ավելացնենք նաև, որ 2016 թ. նոյեմբերին ուկրաինական «Անտոնով» պետական ավիաշինական ընկերության նախկին նախագահ և գլխավոր կոնստրուկտոր Դմիտրի Կիվան հայտարարել էր, որ «Անտոնովում» իր պաշտոնի վերացնելուց հետո տեղափոխվել է Բաքու՝ «Ադրբեջանի ինքնաթիռաշինական արդյունաբերության ստեղծման» ուղղությամբ աշխատելու նպատակով: Սակայն հետագայում այս հարցի հետ կապված այլ տեղեկություններ չտարածվեցին:
Ան-178 ռազմական բեռնատար ինքնաթիռի ցամաքային փորձարկումից (ռազմական մեքենայի բեռնում)