Ապրիլի 23-ին Իսրայելն ԱՄՆ-ից ստացել է պատվիրված F-35 կործանիչներից ևս 3-ը: Կործանիչները վայրէջք են կատարել Իսրայելի հարավում տեղակայված ռազմաօդային ուժերի «Նևաթիմ» ավիաբազայում: Այս մասին հայտնում է իսրայելական Times of Israel լրատվակայքը:
Կործանիչները Իսրայել են հասցրել ամերիկացի օդաչուները: Ավիաբազայում վայրէջք կատարելուց հետո դրանք պաշտոնապես դարձել են Իսրայելի սեփականությունը: Իսրայելում կործանիչները հայտնի են նաև «Ադիր» անվանումով:
Ավելի վաղ՝ 2016-ի դեկտեմբերին, ԱՄՆ-ն առաջին երկու միավոր F-35 կործանիչ էր մատակարարել Իսրայելին: Ընդհանուր առմամբ Իսրայելը ամերիկյան Loocked Martin ընկերությունից պատվիրել է 50 միավոր F-35 կործանիչ՝ յուրաքանչյուրը 100 մլն դոլար արժողությամբ: Նախատեսվում է մատակարարումներն ավարտել 2021 թվականին:
Ամերիկյան ընկերությունն բացի Իսրայելից F-35 կործանիչներ է արտադրում նաև Հարավային Կորեայի, Մեծ Բրիտանիայի, Ճապոնիայի, Ավստրալիայի, Թուրքիայի, Իտալիայի, Նորվեգիայի և Նիդեռլանդների համար: Սակայն այս երկրներից մինչև այժմ միայն Ավստրալիան և Իսրայելն են ստացել:
F-35 կործանիչները հիմնականում արտադրվում են երեք մոդիֆիկացիայով՝ F-35A, F-35B և F-35C, որոնք տարբերվում են ըստ նշանակության:
Իսրայելի կործանիչների մակնիշը լինելու է F-35I, որը F-35A կործանիչի՝ իսրայելական սարքավորումներով հագեցված տարբերակն է, սակայն մատակարարվող առաջին կործանիչների վրա կլինեն բազային-ամերիկյան սարքավորումներ:
Կործանիչն առաջին թռիչքը կատարել է 2006-ին։ Առավելագույն արագությունը 1930 կմ/ժ է, թռիչքի հեռավորությունը՝ 2200 կմ։ Զինված է 25 մմ ավտոմատ թնդանոթով, ունի սպառազինության 6 արտաքին և 2 ներքին կախոց։ Կարող է կրել «օդ-օդ», «օդ-մակերևույթ» և հականավային հրթիռներ, տարատեսակ ռումբեր։
Իսրայելի պատվիրած 3 միավոր F-35 կործանիչները վայրէջք են կատարում «Նևաթիմի» ավիաբազայում.