Ասադ. Սիրիան բանակցում է Ռուսաստանից նոր ռազմական տեխնիկա ստանալու շուրջ

Սիրիան և Ռուսաստանը բանակցություններ են վարում Սիրիայի բանակին նոր ռազմական տեխնիկա, այդ թվում նաև հակաօդային պաշտպանության միջոցներ մատակարարելու համար: Այս մասին ապրիլի 21-ին հայտարարել է Սիրիայի նախագահ Բաշար ալ-Ասադը ռուսաստանյան «ՌԻԱ Նովոստի» գործակալության հետ հարցազրույցում:

Ռուսաստանի ԶՈւ՝ Սիրիայի տեղափոխված և անմիջապես մարտական հերթապահության դրված Ս-400 ՀՕՊ համակարգերի արձակման կայանները

Ռուսաստանի ԶՈւ՝ Սիրիայի տեղափոխված և անմիջապես մարտական հերթապահության դրված Ս-400 ՀՕՊ համակարգերի արձակման կայանները

Սիրիայի նախագահը ընդգծել է նաև, որ Սիրիան հետաքրքրված է հատկապես ՀՕՊ վերջին սերնդի միջոցներով:

«Իհարկե մեզ անհրաժեշտ է նոր ռազմական տեխնիկա, քանի որ պատերազմի ընթացքում դրանց մի մասը սպառվել է: Դա Սիրիայի և ՌԴ պաշտպանության նախարարությունների ամենօրյա քննարկումների մի մասն է»,-ասել է Ասադը:

Ավելի վաղ Ռուսաստանի ՊՆ խոսնակ Իգոր Կոնաշենկովը հայտարարել էր, որ Սիրիայի ԶՈւ սպառազինությունում առկա են Ս-200, «Բուկ» և այլ զենիթահրթիռային համալիրներ:

Հիշեցնենք, որ 2015-ի նոյեմբերին ՌԴ ԶՈւ հակաօդային պաշտպանության զենիթահրթիռային Ս-400 համակարգը տեղափոխվել է Սիրիա և տեղակայվել Սիրիայի «Հմեյմիմ» ավիաբազայում: Այդ համակարգերի տեղակայման նպատակը Սիրիայում գործող ռուսաստանյան ավիացիայի անվտանգության ապահովումն է։ Բացի այդ, 2016-ի հոկտեմբերին Ռուսաստանը Սիրիայում տեղակայել է Ս-300ՎՄ «Անթեյ 2500» զենիթահրթիռային համակարգեր:

Հարցազրույցի ընթացքում Ասադը անդրադարձել է նաև Միացյալ Նահանգների կողմից Սիրիայի «Շայրաթ» ավիաբազայի վրա արձակած հրթիռների խնդրին: Նա նշել է, որ ԱՄՆ-ն այդ գործելակերպը ցույց տվեց, որ Միացյալ Նահանգները չի կարող պահպանել իր խոստումները:

Հիշեցնենք, որ ապրիլի 7-ին ԱՄՆ ռազմածովային ուժերի երկու ռազմանավից Սիրիայի ԶՈւ «Շայրաթ» ավիաբազայի վրա 59 միավոր թևավոր հրթիռ էր արձակվել։ Ավիաբազան մեծ նյութական կորուստներ ունի:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *