Մարտի 9-ին ԱՄՆ ԶՈւ կենտրոնական հրամանատարության (U.S. Central Command) հրամանատար, գեներալ Ջոզեֆ Վոտելը հայտնել է, որ Աֆղանստանում զինյալ խմբավորումների դեմ պայքարելու և արդեն ամրագրած հաջողությունները պահելու համար լրացուցիչ ուժեր պետք կլինեն։ Այս մասին հայտնում է բրիտանական «Ջեյնս» ռազմական հանդեսը։
ԱՄՆ զինված ուժերի MRAP դասի զրահամեքենաները Աֆղանստանի Բաղրամ ավիաբազայում
ԱՄՆ Սենատի՝ զինված ուժերի հարցերոց հանձնաժողովի լսումների ժամանակ Վոտելը ավելացրել է նաև, որ ինքը և Աֆղանստանում ՆԱՏՕ-ի «Վճռական աջակցություն» առաքելության հրամանատար, գեներալ Ջոն Նիկոլսոնը Աֆղանստանում իրենց ծրագրի վերաբերյալ ԱՄՆ պաշտպանության քարտուղար Ջիմ Մետիսի համար խորհուրդներ և առաջարկություններ են մշակում։
«Վճռական աջակցություն» առաքելության շրջանակներում ներկայում Աֆղանստանում ծառայում է ԱՄՆ ԶՈւ 6941 զինծառայող (ըստ ՆԱՏՕ ԳՔ զեկույցի), ինչը նախատեսված է 2014թ. սեպտեմբերին Աֆղանստանի նախագահի և Աֆղանստանում ԱՄՆ դեսպանի ստորագրած պայմանագրով:
Հիշեցնենք, որ Աֆղանստանում «Վճռական աջակցություն» առաքելությանը մասնակցում է նաև Հայաստանը և որտեղ ներկայում ծառայում է ՀՀ ԶՈւ 121 զինծառայող: