Իրանը փորձարկում է տեղական արտադրության «Բավար-373» զենիթահրթիռային համալիրը։ Փորձարկումները շարունակվելու են մինչև զինված ուժերին այդ համալիրների տրամադրումը։ Այս մասին հայտարարել է Իրանի պաշտպանության նախարարի տեղակալ Ամիր Հաթամին։
Մարտի 1-ին Իրանի նախարարի խոսքը փոխանցել է «Թասնիմ» լրատվական գործակալությունը։
Ըստ Հաթամիի՝ պաշտպանական ոլորտում, այդ թվում այս համակարգերի վրա տարվող աշխատանքները ընթանում են հաստատված ծրագրին համապատասխան։
Ավելի վաղ Իրանի ՀՕՊ ուժերի հրամանատար, բրիգադային գեներալ Ֆարզադ Էսմայիլիին հայտարարել էր, որ երբ ԶՀՀ-ն համալրի Իրանի ԶՈւ սպառազինությունը՝ ռուսաստանյան Ս-400 համակարգեր գնելու անհրաժեշտություն Իրանն այլևս չի ունենա:
«Բավար-373» ԶՀՀ-ն Իրանն առաջին անգամ ներկայացրել է 2016-ի օգոստոսին։ Իրանական կողմը մանրամասներ չի տրամադրել ՀՕՊ համակարգերի մասին: Հայտնի է, որ համալիրի ռադարային համակարգը իր պարամետրերով նման է ռուսաստանյան Ս-300-ի համակարգին: Իրանական կողմի պնդմամբ՝ մարտավարատեխնիկական բնութագրերով իրենց ստեղծած համակարգը չի զիջում ռուսաստանյան Ս-300-ին:
Նշենք, որ «Բավար-373» ԶՀՀ-ների արտադրության աշխատանքները Իրանը սկսել էր դեռևս 2010 թ.՝ այն ներկայացնելով որպես ռուսաստանյան Ս-300 ԶՀՀ-ների համարժեք: Խնդիրն այն էր, որ Իրանը այդ ժամանակ միջազգային պատժամիջոցների պատճառով չէր կարողանում նման համակարգեր գնել գնել Ռուսաստանից:
Արդեն 2015-ի ապրիլին, Իրանի նկատմամբ կիրառվող միջազգային պատժամիջոցների մեղմացման վերաբերյալ սպասվող որոշումների համատեքստում Ռուսաստանը հանեց այդ երկրին զենք վաճառելու սահմանափակումը և սկսեց Ս-300 ԶՀՀ-ներ մատակարարել Իրանին։ 2016-ի հոկտեմբերին հայտնի դարձավ, որ Ռուսաստանն ավարտել է համակարգերի մատակարարումը։