Փետրվարի 20-ին Իրանի իսլամական հեղափոխության պահապանների կորպուսի (ԻՀՊԿ) ցամաքային ուժերը երկրի կենտրոնում մեկնարկած «Փեյամբար է ազամ-11» (Մեծն մարգարե) զորավարժության առաջին փուլում հրթիռներով խոցել են պայմանական հակառակորդի թիրախը։
Այս մասին տեղեկացնում է իրանական «Թասնիմ» լրատվական գործակալությունը։
Զորավարժությանը ներգրավված են հրետանային, ՀՕՊ ստորաբաժանումներ, անօդաչու թռչող սարքեր, ցամքային զորքերի ավիացիա։ Վարժանքներին փորձարկվելու են նաև նոր, ճշգրիտ հրթիռներ։
«Փեյամբար է ազամ-11» զորավարժությունը տևելու է 3 օր, անցկացվելու է երկրի կենտրոնում, արևելքում և հյուսիս-արևելքում 2 փուլով։ Վարժանքների ավարտին Բասիջը խաղարկելու է արվարձանների պաշտպանության գործողություններ։
Հիշեցնենք, որ հունվարի վերջին ԻՀՊԿ ցամաքային ուժերը զորավարժություն անցկացրին երկրի արևմուտքում։
Հիշեցնենք նաև, որ 2017-ի հունվարին Իրանի խորհրդարանը ընդունեց օրինագիծ, որով կառավարությունը պարտավորվում է համապատասխան միջոցառումներ ձեռնարկել երկրի պաշտպանունակությունը բարձրացնելու նպատակով։ Օրինագծով, ի թիվս մի շարք այլ միջոցառումների, նախատեսվում է ավելացնել հրթիռների արտադրությունը։
Նշենք նաև, որ ավելի վաղ ԱՄՆ-ն «բալիստիկ հրթիռներ փորձարկելու, ահաբեկիչներին օժանդակելու» համար պատժամիջոցներ սահմանեց Իրանում, Լիբանանում, Չինաստանում, ԱՄԷ-ում տեղակայված 12 ընկերության նկատմամբ։