Սոցցանցերում հայ օգտատերերը պարզել են, որ 2016 թ. օգոստոսի 17-ին մահացել է Ադրբեջանի ԶՈւ զինծառայող Խանիշզադե Ռյովշան Հուսեյն օղլուն (Xanişzadə Rövşən Hüseyn oğlu): Բացի այդ, ադրբեջանական սոցցանցերի գրառումներից Razm.info-ին հայտնի է դարձել 2013 թ. Ադրբեջանի ԶՈւ զինծառայող Աբասով Փենահ Թահիր օղլուի (Abbasov Pənah Tahir oğlu) մահվան մասին:
Ադրբեջանի պաշտպանության նախարարությունը, ինչպես նաև լրատվամիջոցները, ինչպես բազմաթիվ այլ դեպքերում, այս զինծառայողների մահվան մասին ևս որևէ տվյալ չէին հաղորդել:
Խանիշզադե Ռյովշանի մահվան մասին հայտնի էր դարձել դեռևս 2016 թ. սեպտեմբերին, երբ զինծառայողի լուսանկարներն ու անունն ուղարկել էր Ռազմինֆոյի մեր ընթերցողներից մեկը: Սակայն այդ ժամանակ դեռևս չէր հաջողվել պարզել Խանիշզադեի մահվան ամսաթիվը և որոշ այլ մանրամասներ։
Սակայն երեկ՝ հունվարի 29-ին, սոցցանցերի որոշ հայ օգտատերերի շնորհիվ նաև պարզվեց, որ զինծառայողը մահացել է 2016 թ. օգոստոսի 17-ին: Դատելով առկա տեղեկություններից՝ Ռյովշան Խանիշզադեն մահացել է մարմնամարզության ընթացքում՝ սրտի կանգի հետևանքով:
Աբասով Փենահի մահվան մասին հայտնի է դարձել սոցցանցերում ադրբեջանական օգտատերերի գրառումներից: Նշվում է, որ Աբասովը ծնվել էր 1982 թ., ավարտել է Ադրբեջանի բարձրագույն ռազմական ուսումնարանը: Ծառայել է Դաշքեսանի շրջանի Քոշբուլաղ գյուղի տարածքում տեղակայված զորամասում՝ որպես հետախույզ-սպա:
2012-ին տեղափոխվել է Բեյլագանի շրջանի զորամասերից մեկը և ծառայությունը շարունակել որպես հետախուզական ստորաբաժանման հրամանատար: Ըստ առկա տեղեկությունների՝ մահացել է 2013 թ. հունիսի 8-ին՝ ավտովթարի հետևանքով:
Այսպիսով՝ 2016 թ. Ադրբեջանի ԶՈւ հայտնի դարձած կորուստների թիվը հասնում է 154-ի, իսկ 2013 թ.՝ 83-ի: Սակայն, ինչպես արդեն բազմիցս նշել ենք, այս տվյալներն ամբողջական չեն, ու ադրբեջանական կողմի իրական կորուստների թիվը շատ ավելի մեծ է:
Pingback: Ադրբեջանական զինուժի կորուստները 2017-ի հունվարին. Razm.info | Ռազմ.info