Հունվարի 19-ին Ադրբեջանի նախագահ Իլհամ Ալիևը ռուսաստանյան «ՌԻԱ Նովոստի» լրատվական գործակալությանը հայտնել է, որ «Ադրբեջանը Ռուսաստանի հետ բանակցում է նոր սպառազինության գնման համար, հետաքրքրված է ռուսաստանյան արտադրության պաշտպանական տեխնոլոգիաներով»:
Ռուսաստանյան գործակալությունը փոխանցում է Ալիևի հայտարարությունը, որտեղ նա մասնավորապես նշում է, որ խոսքը վերաբերում է ՌԴ արտադրության ուղղաթիռներին, պաշտպանական համակարգերին, ինչպես նաև այլ սպառազինության:
Ադրբեջանի՝ Ռուսաստանից գնած Տ-90Ս տանկերը
Ալիևը նաև նշել է, որ «մինչ օրս կողմերը ստորագրել են 5 մլրդ դոլարի պայմանագրեր, որոնց մեծ մասն արդեն իրականացվել է»:
Ալիևի հայտարարությունից հետևում է, որ կողմերի միջև դեռևս որևէ պայմանավորվածություն չկա, ընթանում են բանակցություններ:
Այստեղ հատկանշական է, որ վերջերս Ադրբեջանը հայտարարել է նաև Պակիստանից սպառազինություն գնելու մտադրության մասին, սակայն հետագայում որևէ գործարքի մասին տեղեկություն չի հրապարակվել: Նույն կերպ ադրբեջանական աղբյուրները լուրեր են տարածում, որ Ադրբեջանն մտադիր է Իսրայելից գնել «Երկաթե գմբեթ» հակահրթիռային համակարգեր, և այս դեպքում նույնպես հստակ պայմանավորվածությունների մասին խոսք չկա:
Նշենք, որ Ադրբեջանին զենքի հիմնական մատակարարը հենց Ռուսաստանն է: 2011 թ. ստորագրված ամենախոշոր պայմանագրով (մոտ 1,3 մլրդ դոլար) Ադրբեջանը մասնավորապես գնել է.
- Տ-90Ս տանկեր
- ԲՄՊ-3 հետևակի մարտական մեքենաներ
- «Մստա-Ս» ինքնագնաց հաուբից
- «Վենա» ինքնագնաց / ականանետ
- «Սմերչ» ՀԿՌՀ
- «Սոլնցեպյոկ» ծանր հրանետ
- 2Բ24/2Բ11 ականանետներ
Սրանից բացի, այլ պայմանագրերով Ադրբեջանը Ռուսաստանից գնել է նաև Ս-300ՊՄՈւ-2 համակարգեր, ուղղաթիռներ, պայմանավորվել է սեփական տարածքում Կալաշնիկովի ավտոմատներ արտադրելու մասին և այլն:
Վերջին տարիներին ռազմական ոլորտում Ադրբեջանին զենք մատակարարող խոշոր երկրից է նաև Իսրայելը: Ադրբեջանի նախագահն ավելի վաղ նշել էր նաև այս երկրից 5 մլրդ դոլարի սպառազինություն գնելու պայմանագրերի մասին, սակայն բաց աղբյուրներում նման ծավալի գնումների մասին խոսք չկա: