Հայաստանի բարձրլեռնային «Կամխուդ» զորավարժարանում մեկնարկել է Գյումրիում տեղակայված ռուսաստանյան 102-րդ ռազմաբազայի ռադիացիոն, քիմիական, կենսաբանական պաշտպանության (ՌՔԿՊ) ստորաբաժանումների զինծառայողների դաշտային ելքը։ Վարժանքներին ներգրավվել են քիմիական հետախուզության ՌԽՄ-6 մեքենաներ։ Այս մասին հայտնում է ՌԴ ՊՆ կայքը։
Մեկամսյա վարժանքներին զինծառայողները սովորելու են իրականացնել ՌՔԿ հետախուզություն, զինտեխնիկայի և հանդերձանքի ապաակտիվացում և գազազերծում, վարակված տեղանքի հաղթահարում։
Վարժանքներին մշակվելու են պայմանական հակառակորդի կողմից քիմիական զենքի կիրառման և տեղանքի ռադիացիոն վարակման պայմաններում հակադիվերսիոն պայքարի մեթոդներ։
Զորավարժության ավարտին ստորաբաժանումները կմասնակցեն «Բանակային միջազգային խաղեր-2017-ի» «Անվտանգ միջավայր» մրցույթի ընտրական փուլին։