ՀՀ կառավարությունը դեկտեմբերի 22-ի նիստում ընդունել է «Ռազմարդյունաբերական և ռազմատեխնիկական քաղաքականության ռազմավարությունը հաստատելու մասին» ՀՀ նախագահի կարգադրության նախագիծը, որի հավելվածում շարադրված է ՀՀ ռազմարդյունաբերական և ռազմատեխնիկական ռազմավարությունը։ Այս մասին հայտնում է ՀՀ կառավարության կայքը։
Նախագծի ընդունումը կնպաստի ՀՀ ռազմական արդյունաբերության համակարգային բարեփոխումների իրականացմանը:
Փաստաթղթի հրապարակված նախագծի համաձայն՝ Հայաստանի ռազմարդյունաբերական համալիրի զարգացման պետական քաղաքականության ռազմավարությունը հիմնվում է մինչև 2015թ. ընկած ժամանակաշրջանում ՀՀ ռազմարդյունաբերության ոլորտում ձեռք բերած արդյունքների, ինչպես նաև 2016թ. ապրիլյան պատերազմի փաստերի վերլուծության վրա:
Մինչև 2020թ. ՀՀ ռազմատեխնիկական քաղաքականության գերակա ուղղություններն են.
1) սպառազինության և ռազմատեխնիկական ունեցվածքի նորոգում, արդիականացում,
2) նոր սպառազինության և ռազմական տեխնիկայի և ռազմատեխնիկական ունեցվածքի ստեղծում և արտադրում, դրանք են`
- հրաձգային զենքեր, զինամթերք, ռազմական տեխնիկայի և ռազմատեխնիկական ունեցվածքի, թեթև սպառազինություն, հրետանային միջոցներ, սպառազինության և ռազմական տեխնիկայի և ռազմատեխնիկական ունեցվածքի բազային և հատուկ մասեր
- լազերային, օպտիկաէլեկտրոնային, ռադիոէլեկտրոնային և ռադիոլոկացիոն սպառազինություն,
- անօդաչու թռչող սարքեր, հարվածային անօդաչու թռչող սարքեր և դրանց հակազդման միջոցներ,
- հետախուզության տեխնիկական միջոցներ,
- կապի տեխնիկական միջոցներ,
- նավարկային միջոցներ,
- ռադիոէլեկտրոնային պայքարի միջոցներ,
- քիմիական և կենսաբանական պաշտպանական միջոցներ:
3) հրթիռաշինության զարգացում,
4) ավտոմատացված կառավարման համակարգերի ստեղծում:
ՀՀ ռազմատեխնիկական քաղաքականության գերակա ուղղությունները կարող են փոփոխվել ռազմաքաղաքական իրավիճակից ելնելով:
«Ռազմարդյուաբերական և ռազմատեխնիկական քաղաքականության» նպատակներն են
- պետության աջակցությամբ գիտատեխնիկական և արտադրա-տեխնոլոգիական ներուժը վերածել համակարգաստեղծ տեխնոլոգիական գործուն ու նորարարական միջոցի, որը կապահովի ՀՀ ռազմական անվտանգության ապահովման համապատասխան Ռազմարդյունաբերական համակարգի հզորություն, ինչպես նաև տնտեսական զարգացում և կնպաստի հնարավոր ցնցումների դիմակայմանը,
- ամրապնդել ռազմարդյունաբերական համակարգի դերը ՀՀ նորարարական զարգացման մեջ,
- հասնել ՀՀ-ում արտադրվող և արտերկրից ձեռք բերվող սպառազինության և ռազմական տեխնիկայի ռազմատեխնիկական ունեցվածքի և հատուկ տեխնիկայի ծավալների օպտիմալ հարաբերակցությանը,
- ՀՀ ռազմարդյունաբերական կազմակերպությունների արտադրանքի մրցունակություն ապահովել արտերկրի շուկաներում:
Այդ նպատակով նախատեսվում է.
- ստեղծել ռազմական գիտահետազոտական կառույց` ՀՀ զինված ուժերի պահանջարկին համապատասխան գիտահետազոտական և փորձակոնստրուկտորական աշխատանքների մարտավարատեխնիկական առաջադրանքների և դրանց իրականացման նպատակով անհրաժեշտ ելակետային տվյալների մշակման, ինչպես նաև ռազմագիտատեխնիկական ուղեկցման համար,
- ստեղծել պետական, ինչպես նաև և ոչ պետական կառույցների կողմից հիմնադրամներ՝ ՀՀ ռազմարդյունաբերության զարգացման ծրագրերի ֆինանսավորման նպատակով
- ձևավորել ռազմատեխնիկական քաղաքականության ուղղություններով պետական, ինչպես նաև ոչ պետական բաժնեմասով կազմակերպություններ՝ նրանցում պարտադիր ստեղծելով կամ ընդգրկելով համապատասխան գիտատեխնիկական կառույց (կոնստրուկտորական բյուրո կամ գիտահետազոտական ինստիտուտ)
- հիմնադրել համակարգային հիմնախնդիրներ պարունակող սպառազինության և ռազմական տեխնիկաների մշակման համար պետական պատասխանատուների ինստիտուտ:
Pingback: ՀՀ նախագահը հաստատել է ռազմարդյունաբերական և ռազմատեխնիկական քաղաքականության ռազմավարությունը | Ռազմ.info