Սիրիայում սպանվել է Թուրքիայի ԶՈւ 14 զինծառայող

Դեկտեմբերի 21-ին սիրիական Ալ-Բաբ քաղաքի տարածքում ընթացող մարտերում սպանվել է թուրքական զինուժի 14 զինծառայող և վիրավորվել է ևս 33-ը: Թուրքական բանակի համար այս կորուստներն ամենախոշորն են եղել Սիրիա ներխուժումից ի վեր: Այս մասին հայտնում է Reuters գործակալությունը:

Վերահսկողության գոտիները Սիրիայի Ալ Բաբ քաղաքի շուրջ (21 դեկտեմբերի 2016)

Միաժամանակ թուրքական կողմը հայտարարել է, թե նույն մարտերի ընթացքում իրենց հակառակորդ «Իսլամական պետություն» ահաբեկչական խմբավորումից սպանվել է 138 զինյալ:

Նշենք, որ սպանված 14 զինծառայողից 4-ի մասին ավելի վաղ էր հայտնի դարձել: Դեկտեմբերի 21-ին հայտնի էր դարձել նաև թուրքական բանակի 4 վիրավորի մասին

Այնուամենայնիվ, Թուրքիայի զինուժը և նրան աջակցող, հիմնականում Սիրիայի թուրքմեններից կազմված «Սիրիայի ազատ բանակ» խմբավորման զինյալները վերջնական վերահսկողություն էին սահմանել Սիրիայի հյուսիսում Ալ-Բաբ-Հալեպ ճանապարհի վրա:

Մինչ այդ էլ՝ դեկտեմբերի 19-ին, Ալ-Բաբի շրջանում Թուրքիայի զինուժի գործողությունների ժամանակ սպանվել է երկրի ԶՈւ 1 զինծառայող, ևս 7 զինծառայող վիրավորվել է: Դեկտեմբերի 17-ին Սիրիայում վիրավորվել է ևս 3 զինծառայող:

Ալ-Բաբը Սիրիայի հյուսիում «Իսլամական պետություն» ահաբեկչական խմբավորման վերահսկության տակ գտնվող վերջին խոշար բնակավայրն է: Ալ-Բաբը կարևոր ռազմավարական դիրք ունի Սիրիայի հյուսիսում՝ մասնավորապես այն փակում է քրդական երկու ինքնավար շրջանների՝ Աֆրինի և Քոբանիի միջև ճանապարհը, հետևաբար Թուրքիայի զինուժը ամեն կերպ փորձում է վերահսկողություն սահմանել Ալ-Բաբի վրա:

ԻՊ-ից Ալ-Բաբի գրավման գործողությունը Թուրքիայի զինուժը սկսել է սեպտեմբերի 16-ից, մինչև այժ ռազմական գործողությունները շարունակվում են այդ շրջանում:

Թուրքիայի զինուժը Սիրիայի թուրքմեն զինյալների հետ սկսել է Ալ-Բաբը ԻՊ-ից «մաքրելու» գործողությունը

Հիշեցնենք, որ օգոստոսի 24-ից թուրքական զինուժը ներխուժել է Սիրիայի ցամաքային տարածք՝ հայտարարելով ԻՊ դեմ ռազմական գործողություններ իրականացնելու և իր սահմանը իսլամիստ գրոհայիններից «մաքրելու» մասին:

Սակայն գործողությունների ընթացքը ցույց են տալիս, որ Թուրքիան կյանքի է կոչում Սիրիայում «անվտանգության գոտի» ստեղծելու նպատակները, ինչի հիմքում Սիրիայի տարածքում քրդերի հսկողության տակ գտնվող երկու տարածքների միավորումը բացառելն է: