Իրանի բանակի ցամաքային ուժերը 3 կմ հեռավորությունից փորձարկել են տեղական արտադրության 23 մմ տրամաչափով «Բահեր» դիպուկահար հրացանը: Այս մասին տեղեկացնում է իրանական «Դեֆապռես» լրատվական կայքը:
Նշենք, որ իր տեսակով դիպուկահար հրացանը միակն է աշխարհում (20մմ տրամաչափից ավելի խոշոր զինատեսակները ընդունված է համարել թնդանոթ): Իրանն այն առաջին անգամ ներկայացրել է 2015թ ապրիլին:
«Բահերը» կշռում է 62 կգ, կրակի արդյունավետ հեռավորությունը՝ 4 կմ, միալիցք է (ամեն կրակոցից հետո անհրաժեշտ է նորից լիցքավորել): Նախատեսված է հակառակորդի տեխնիկական միջոցները շարքից հանելու համար: Առաջին անգամ փորձարկվել է 2015թ. հոկտեմբերին` ցամաքային զորքերի «Մոհարամ» զորավարժության ժամանակ:
Հիշեցնենք, որ ավելի վաղ «Մուհամմադ ռասուլ Ալլահ» զորավարժության ժամանակ Իրանը ներկայացրեց նոր դիպուկահար հրացաններ,մասնավորապես խորհրդային/ռուսաստանյան արտադրության ՍՎԴ դիպուկահար հրացանի իրանական տարբերակը և « Թահերը»: