ԱՄՆ-ն երկու միավոր F-35 կործանիչներ է մատակարարել է Իսրայելին: Կործանիչները վայրէջք են կատարել «Նեվաթիմի» ավիաբազայում դեկտեմբերի 12-ին, դրանք ստացել են «Ադիր» անվանումը: Այս մասին տեղեկացնում է Reuters գործակալությունը:
Իսրայելին մատակարարված առաջին F-35 կործանիչներից մեկը
Իսրայելն ամերիկյան Loocked Martin ընկերությունից պատվիրել է ընդհանուր առմամբ 50 միավոր F-35 կործանիչ՝ յուրաքանչյուրը 100 մլն դոլար արժողությամբ: Նախատեսվում է մատակարարումներն ավարտել 2021 թվականին:
F-35 կործանիչներ գնելու պայմանագիր Իսրայելն ու ԱՄՆ-ն ստորագրել են 2010թ, որով նախատեսվում էր 2,75 մլրդ դոլար արժողության 19 միավոր կործանիչ գնել:
2015թ. փետրվարին կնքվում է լրացուցիչ պայմանագիր՝ Իսրայելին ևս 14 միավոր F-35 կործանիչներ մատակարելու մասին: Գործարքի արժեքը 2,82 մլրդ դոլար էր գնահատվում:
2016թ. նոյեմբերին Իսրայելի կառավարությունը պատվերն ավելացրեց ևս 17 միավոր կործանիչով, այսպիսով մատակարարվելիք կործանիչների թիվը հասցնելով 50-ի:
Իսրայելի վարչապետ Բենյամին Նեթանյահուն՝ Իսրայելի օդուժի առաջին F-35 կործանիչների մեկի ֆոնին
Նշենք նաև,որ Lockhed Martin ընկերությունը F-35 կործանիչներ է արտադրում նաև Հարավային Կորեայի, Մեծ Բրիտանիայի, Ճապոնիայի, Ավստրալիայի, Թուրքիայի, Իտալիայի, Նորվեգիայի և Նիդեռլանդների համար:
F-35 կործանիչները հիմնականում արտադրվում են երեք մոդիֆիկացիայով՝ F-35A, F-35B և F-35C, որոնք տարբերվում են ըստ նշանակության: Մասնավորապես F-35A տարբերակը նախատեսված է ռազմաօդային ուժերի համար, այն ավելի պարզեցված ու ավելի էժան է, ինչի պատճառով զանգվածային արտադրության մեջ լինելու է հենց այս տարբերակը: Այս տարբերակից է պատվիրել նաև Իսրայելը:
Իսրայելի կործանիչների մակնիշը լինելու է F-35I, որը F-35A կործանիչի՝ իսրայելական սարքավորումներով հագեցված տարբերակն է, սակայն մատակարարվող առաջին կործանիչների վրա կլինեն բազային-ամերիկյան սարքավորումներ:
F-35B տարբերակը ծովային դեսանտի համար է ստեղծվել, ու ըստ այդմ՝ այս տարբերակը ունի կարճ տարածության վրա օդ բարձրանալու ու ուղղահայաց վայրէջքի հնարավորություն: F-35C տարբերակը նույնպես նախատեսված է ռազմաօդային ուժերի համար, սակայն կարողանում է ցածր արագություններում բարձր մանևրայնություն ցուցաբերել:
Կործանիչն առաջին թռիչքը կատարել է 2006-ին։ Առավելագույն արագությունը 1930 կմ/ժ է, թռիչքի հեռավորությունը՝ 2200 կմ։
Զինված է 25 մմ ավտոմատ թնդանոթով, ունի սպառազինության 6 արտաքին և 2 ներքին կախոց։ Կարող է կրել «օդ-օդ», «օդ-մակերևույթ» և հականավային հրթիռներ, տարատեսակ ռումբեր։
F-35 կործանիչ. Իսրայելի ԶՈւ