Նոյեմբերի 21-ին մամուլի ասուլիսի ժամանակ Իրանի ռազմածովային ուժերի հրամանատար, դերծովակալ Հաբիբոլահ Սայարին հայտարարել է, որ շուտով Իրանը կներկայացնի տեղական արտադրության ռադարային համակարգ, որը կարող է օգտագործվել ռադիոէլեկտրոնային պայքարում, ինչպես նաև 3 ուղղաթիռ և օդային բարձիկով 5 նավ: Այս մասին տեղեկացնում է իրանական «Ֆարս» լրատվական գործակալությունը:
Ուղղաթիռները և նավերը ներկայացվելու են դեկտեմբերի 6-ին:
Միաժամանակ Հաբիբոլահ Սայարին հայտարարել է, որ Իրանի ՌԾՈւ-ն ընթացիկ տարում արդեն անցկացրել է 10 զորավարժություն և մոտ օրերս կանցկացնի վարժանքներ սուզանավերի ներգրավվածությամբ , ինչպես նաև որոնողափրկարարական վարժանքներ Օմանի հետ:
Նշենք, որ իրանական օրացույցով բահման ամսին (հունվարի 20 — փետրվարի 18, 2017) Իրանի ՌԾՈւ-ն Հնդկական օվկիանոսում կանցկացնի «Վելայեթ 95» զորավարժությունը:
Իսկ 2016-ի տարեսկզբին Իրանի ռազմածովային ուժերն անցկացրել են «Վելայեթ 95-ի» նախորդ՝ «Վելայեթ 94» զորավարժությունը:
Հիշեցնենք նաև, որ ավելի վաղ՝ հոկտեմբերին, Իրանը ներկայացրել է «Մերաջ-4» և «Մաթլա օլ Ֆաջր-3» ռադարները: Իրանի պաշտպանության նախարար Հոսեյն Դեհղանի խոսքերով՝ «Մերաջ-4» ռադարը սպառազինված է ռադիոէլեկտրոնային պայքարի տեխնոլոգիաներով և կարող է հետևել 200 թիրախի, իսկ «Մաթլա օլ Ֆաջրը» կարող է թիրախները հայտնաբերել 500կմ հեռավարության վրա:
Նախորդ տարվա սեպտեմբերին էլ Իրանը շահագործման էր հանձնել Nazir և Bina ռադարները, ռադիոտեղորոշման նոր Qaem համակարգը:
Pingback: Ռազմաշաբաթ. Տարածաշրջան. 20 նոյեմբեր – 26 նոյեմբերի, 2016 | Ռազմ.info