[Լրացված] Զինծառայողների կյանքին կամ առողջությանը պատճառված վնասների հատուցման համակարգը (աղյուսակ)

Այսօր՝ նոյեմբերի 10-ին, ՀՀ կառավարությունը հավանություն է տրվել մի շարք օրենքներում փոփոխություններ կատարելու նախագծերի փաթեթին, որով կարգավորվելու են մարտական պայմաններում զոհված կամ հաշմանդամություն ստացած զինծառայողների և նրանց ընտանիքների սոցիալական պաշտպանության հարցերը: Այս մասին հայտնում է ՀՀ կառավարության կայքը։

ՀՀ ԶՈւ զինծառայողներ

[Լրացված] Դեկտեմբերի 30-ին ՀՀ  նախագահ Սերժ Սարգսյանը ստորագրել է Ազգային Ժողովի ընդունած Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքը։

Նախագծով առաջարկվում է հատուցման գումարներ վճարել այն զինծառայողներին, ովքեր մահացել կամ հաշմանդամություն են ստացել մարտական գործողություններին մասնակցելու կամ հակառակորդի հետ շփման գծում մարտական հերթապահության կամ հատուկ առաջադրանք կատարելու ժամանակ:

«2016թ. ապրիլ ամսվա դեպքերը ցույց տվեցին, որ ծավալուն մարտական գործողություններ սկսվելու պարագայում, դրա արդյունքում զինծառայողների կյանքին կամ առողջությանը պատճառված վնասները միայն ՀՀ պետական բյուջեի միջոցների հաշվին ամբողջ ծավալով հատուցելը խնդրահարույց է, և դրա համար անհրաժեշտ են ֆինանսավորման լրացուցիչ աղբյուրներ», — նշվում է նախագծին կից կառավարության հիմնավորման մեջ:

Հատուցման գումարների վճարումն իրականացնելու նպատակով նախագծով առաջարկվում է ստեղծել հիմնադրամ:

Հիմնադրամի կողմից հատուցումներ վճարելու համար անհրաժեշտ դրամական միջոցները կձևավորվեն հետևյալ աղբյուրներից.

• Յուրաքանչյուր աշխատող ֆիզիկական անձի կողմից ամսական 1000 դրամ գումարի չափով վճարվող դրոշմանիշային վճարներից.
• Պետական կառավարման կամ տեղական ինքնակառավարման մարմինների կողմից մատուցվող ծառայություններից օգտվող անձանց կողմից վճարվող վճարներից` յուրաքանչյուր ծառայության համար` համապատասխանաբար` 500 և 200 դրամ գումարի չափով.
• Հատուկ այդ նպատակով թողարկված արժեթղթերի վաճառքից.
• Հատուկ այդ նպատակով ստացված դրամաշնորհներից, նվիրաբերություններից և նվիրատվություններից.
• Վերը նշված աղբյուրներից հավաքագրված միջոցների կառավարման (ներդրման) արդյունքում ստացվող եկամուտներից:

Նախագիծը մշակվել է ՀՀ պաշտպանության նախարարության կողմից` համագործակցելով ՀՀ աշխատանքի և սոցիալական հարցերի նախարարության և ՀՀ կենտրոնական բանկի հետ:

ՀՀ պաշտպանության նախարարության ներկայացրած հիմնավորման մեջ նշվում են նաև զինծառայողներին կամ նրանց ընտանիքներին տրվող գումարների չափերը:

Կառավարության որոշումը մեկնաբանելով՝ ՀՀ աշխատանքի և սոցիալական հարցերի նախարար Արտեմ Ասատրյանն այսօր՝ նոյեմբերի 10-ին նշել է. «Հիշում եք՝ ապրիլյան դեպքերի հետ կապված կար որոշակի ոչ համակարգված աշխատանք, մասնավորապես՝ զոհվածների կամ հաշմանդամ դարձած անձանց ընտանիքների երաշխիքների տրամադրման հետ կապված։ Այս համակարգի ներքո ամբողջությամբ այն բոլոր խնդիրներին, որոնք մենք ժամանակին առնչվեցինք և քննարկումներ ունեցանք, ըստ էության, համակարգային լուծում է տրվում, և կարծում եմ՝ այս առումով հասարակության կողմից ընդունելի մոտեցում է լինելու»: Փոխանցում է հայաստանյան «Հետք online» լրատվակայքը:

Մինչ այս զինծառայողներին և նրանց ընտանիքներին ապահովագրական վճարների տրամադրման, հիմնադրամի ստեղծման ծրագրի մասին հայտնի էր դարձել նոյեմբերի 8-ին, ՀՀ նախագահի և ՀՀ պաշտպանության նախարարի հանդիպումից:

Վիգեն Սարգսյանը նշել էր, որ այդ գումարը, որպես ապահովագրական վճար, կվճարվի 20 տարի շարունակ՝ կազմելով սպայական անձնակազմի համար 82 մլն. դրամ, ենթասպայական անձնակազմի պարագայում՝ 70 մլն. դրամ և շարքայինների դեպքում՝ 48 մլն. դրամ: