Հայաստանում նախագծվել և հավաքվել են (արտադրվել են) ռադիոէլեկտրոնային պայքարի «Ամպրոպ» և «Մանուշակ» կայաններ, որոնցից առաջինը մասնակցել է Ապրիլյան պատերազմին, իսկ երկրորդը կատարելագործվել ու ներկայացվել է պատերազմից հետո:
ՌԷՊ երկու կայանները ներկայացվել են Երևանում անցկացված ArmHiTec ռազմարդյունաբերական ցուցահանդեսի ժամանակ:
Կայանների մասնագետը Ռազմինֆոյի հետ զրույցում նշել է, որ «Ամպրոպն» ու «Մանուշակը» նախատեսված են հակառակորդի ռադիոկապի ճնշման համար և աշխատում են գերկարճալիք տիրույթում՝ 20-520 մեգահերց հաճախականային տիրույթում:
Մասնագետի խոսքով՝ ՌԷՊ կայանը հավաքել են խորհրդային ՄՏԼԲՈւ զրահապատ թրթուռավոր մեքենայի բազայի վրա: Կայանի անտենան, ներսի կահավորումը՝ աշխատանքային համակագիչները, օդափոխիչները և այլ տեխնիկան հավաքվել են Հայաստանում:
Կայանը հետախուզում է թշնամու ռադիոկապի ազդանշանները 20-520 մեգահերց հաճախություններում և ճնշում-խլացնում է դրանք: Կայանը միաժամանակ ճնշում է մինչև 10 հաճախականություն:
— Եթե, օրինակ, [հակառակորդն] աշխատում է 30 մեգահերց հաճախությունում, կայանը հայտնաբերում է այդ հաճախությունը և ճնշում այն: Կայանն աշխատում է լրիվ մարտավարական օղակում, մինչև 40 կմ հեռավորության վրա կապը հետախուզելու և մինչև 30 կմ ճնշելու հնարավորություն ունենք, — մանրամասնել է կայանի մասնագետը:
Կայանն աշխատում է երկու տարբերակով՝ ճնշում է ինչպես ֆիքսված հաճախությունները, այնպես էլ աշխատանքային հաճախությունների ծրագրային փոփոխության ռեժիմով ռադիոկապը (ППРЧ, FHSS): Վերջինի դեպքում եթե հակառակորդը սկսում է «ցատկեր անել» ռադիոհաճախություններով, կայանը հետախուզում է ամբողջ տիրույթը, հաշվարկում-որոշում է ցատկերի հաջորդականությունը և ճնշում է այդ հաճախությունները:
Կայանի մասնագետի խոսքով՝ «Ամպրոպն» ունի կարևոր առավելություն. այն չի ճնշում յուրային կողմի ռադիոկապի հաճախությունները: Այսինքն, հակառակորդի ռադիոկապը հետախուզելիս և ճնշելիս ՌԷՊ կայանը բաց է թողնում այն հաճախությունները, որոնք օգտագործվում են հայկական կողմի ռադիոկապի համար, և հայկական կողմի կապը չի խափանվում: Նախկինում կայանը բաց էր թողնում նախապես տրված 4 «հայկական» հաճախություն, իսկ կատարելագործումից հետո՝ 7 նման հաճախություն:— Կայանն առաջին շահագործումն ունեցել է Ապրիլյան պատերազմին և հաջող կատարել է իր առջև դրված խնդիրը, — նշել է Ռազմինֆոյի զրուցակիցը:
ՌԷՊ կայաններից մյուսը՝ «Մանուշակը» պատրաստվել է պատերազմից հետո, սակայն ըստ մեր զրուցակցի՝ կարելի է ասել, որ նույնպես մասնակցել է պատերազմին, քանի որ նույն սկզբունքով է աշխատում, ինչ «Ամպրոպը»:
— Օպերացիոն համակարգը լրիվ նույնն է, ուղղակի կա տարբերություն արդիականացման մեջ, անտենան տեղադրված է մեջտեղում և այլն, բայց աշխատանքի ամբողջ գործողությունը նույնն է, — «Մանուշակ» կայանի մասին նշել է կայանների մասնագետը:
Կայաններին կից ներկայացված տեղեկատվական ցուցանակների համաձայն՝ ի տարբերություն «Ամպրոպ» կայանի՝ «Մանուշակը» միաժամանակ կարող է ճնշել մինչև 4 հաճախություն: Սակայն այն բացազատվում է երկու անգամ ավելի արագ:
Նշված երկու կայանների կողքին ներկայացված էր նաև ՈւԱԶ մեքենայի մեջ հավաքված «Մորտիրա» կայանը, որն իր հերթին նախատեսված է թշնամու ռադիոկապի ճնշման և ապակողմնորոշման համար:
— Կայանը նախատեսված է գերկարճալիք տիրույթում ռադիոցանցերում աղմուկների ստեղծման և ապատեղեկատվության հաղորդման համար, 25-2600 ՄՀց հաճախություններում, — Ռազմինֆոյի հետ զրույցում մանրամասնել է կայանների մասնագետը:
Այս կայանի դեպքում նույնպես ունեցած մեքենայի վրա Հայաստանում հավաքել են անտենան, համակարգիչները, այլ սարքավորումները և պատրաստել են ամբողջական կայան:
Մասնագետի խոսքով՝ հակառակորդը կարող է հայտնաբերել, թե որտեղից է ազդանշանը գալիս և իմանալ, որ ազդանշանը հայկական կողմն է ուղարկում, բայց քանի որ կայանները շարժական են, դրանք կարող են արագ կատարել իրենց աշխատանքն ու հեռանալ՝ թույլ չտալով, որ հակառակորդը հասցնի հետախուզել ազդանշանը:
— [Ապրիլյան պատերազմին] «Մորտիրան» միանշանակ կիրառվել է, կիրառվում է առ այսօր, շատ էֆեկտիվ իր գործողությունը կատարում է, — Ռազմինֆոյի հետ զրույցում նշել է կայանների մասնագետը: