Սիրիայում ահաբեկչական կազմակերպությունների դեմ ավիահարվածներին մասնակցող ռուսաստանյան ավիախումբը համալրել են ՌԴ ԶՈւ Սու-24 և Սու-34 մի քանի ռմբակոծիչ ինքնաթիռներ։ Այս մասին ռուսաստանյան «Իզվեստիա» լրատվակայքին հայտնել են նրա աղբյուրները։
Լրատվամիջոցի փոխանցմամբ՝ նոր ինքնաթիռներն ավիախումբը համալրել են մյուս ինքնաթիռների պլանային փոխարինման հետ միաժամանակ։
Բացի արդեն Սիրիա տեղափոխված ինքնաթիռներից, ռուսաստանյան կողմը նախատեսում է այնտեղ ուղարկել նաև Սու-25 գրոհիչ ինքնաթիռներ, որոնք նույնպես կմասնակցեն ավիահարվածներին։ Այս ինքնաթիռների խումբը, ըստ լրատվամիջոցի աղբյուրի, «կազմ ու պատրաստ» սպասում է հրամանի՝ 2-3 օրում Սիրիա տեղափոխվելու համար։
Լրատվամիջոցը նշում է, որ Սու-25 գրոհիչները Սիրիայում կիրառվելու են ռմբակոծիչների դերում։ Դրանք, ի տարբերություն մյուս ինքնաթիռների, ավելի քիչ սպասարկում են պահանջում, ինչը հեշտացնում է դրանց կիրառությունը։
Բացի այդ, ռուսաստանցի փորձագետ Անտոն Լաավրովը լրատվամիջոցին հայտնել է, որ Սու-25-երը կարող են օրական մինչև 10 թռիչք անել, մինչդեռ օրինակ Սու-34 ռմբակոծիչները կարող են օրական միայն երկու թռիչք կատարել։ Սա նույնպես ավելի արդյունավետ է դարձնում Սու-25-երի կիրառումը։
Լրատվամիջոցը նշում է, որ այս ավիախմբի մեծացմանը Ռուսաստանը գնացել է այն բանից հետո, երբ Սիրիայում չի հաջողվել հրադադար հաստատել։
Հրադադարը, հիշեցնենք, Սիրիայում ուժի մեջ էր մտել սեպտեմբերի 12-ին` արևի մայր մտնելուն պես: Մի քանի օր անց, սակայն, մի շարք բախումներ եղան կառավարական ուժերի և զինյալ խմբավորումների միջև, ինչից հետո հրադադարի ռեժիմը չեղարկվեց:
Տեղին է հիշեցնել նաև, որ օրեր առաջ Ռուսաստանը հայտարարել է, որ Սիրիայի ափերի մոտ է ուղարկում իր «Ադմիրալ Կուզնեցով» ավիակիրը, որի վրա հերթապահություն են իրականացնելու 15 միավոր Սու-33 կործանիչներ, ՄիԳ-29/ԿՈւԲ կործանիչներ և մոտ 10 միավոր Կա–52Կ, Կա-27, Կա-31 ուղղաթիռներ:
Ինչ վերաբերում է Սիրիայում գործող ռուսասանյան ավիախմբին, ապա Ռուսաստանը Սիրիայի կառավարության թույտվությամբ այդ երկրի տարածքում իր ռազմաօդային ուժերի ստորաբաժանումներ տեղակայել է դեռևս 2015-ի հոկտեմբերից և ավիահարվածներ է հասցնում ահաբեկչական խմբավորումների դիրքերին: