Սեպտեմբերի 17-ին Իսրայելը առաջին անգամ Սիրիայի տարածքից դեպի Իսրայել արձակված հրթիռները կասեցնելու համար գործի է դրել սեփական արտադրության Iron Dome հակահրթիռային պաշտպանության համակարգը: Այս մասին հայտնում է Reuters լրատվալան գործակալությունը:
Նշվում է, որ չնայած՝ Սիրիայում տարբեր խմբավորումների միջև ընթացող կռիվները հաճախակի ներթափանցել են Իսրայելի կողմից վերահսկվող Գոլանի բարձունքներ, սա առաջին դեպքն է, որ այդ ուղղությամբ Իսրայելը կիրառել է Iron Dome հակահրթիռային պաշտպանության համակարգ:
Համակարգը կիրառելու մասին իր Թվիթերի էջում հայտնել է նաև Իսրայելի պաշտպանության բանակը՝ նշելով, որ վիրավորներ չկան:
A short while ago a projectile fired from Syria was intercepted by the Iron Dome aerial defense system. No injuries were reported.
— IDF (@IDFSpokesperson) September 17, 2016
Իսրայելը սովորաբար Iron Dome համակարգերը տեղակայում է միջսահմանային կրակի թիրախում գտնվող շրջաններում՝ մասնավորապես Գազայի հատվածի մերձակայքում, որտեղից դեպի Իսրայելի տարածք պարբերաբար հրթիռներ են արձակվում:
Սիրիայի պարագայում, սակայն, Իսրայելը իր տարածք արձակված կրակին հաճախ պատասխանում էր ավիահարվածներով` մասնավորապես սեպտեմբերի 14-ին Իսրայելի ռազմաօդային ուժերի կործանիչները 2 ավիահարված էին հասցրել Սիրիայի Ղունայտռա նահանգում տեղակայված սիրիական կառավարական ուժերի հրետանային բազային:
Իսկ ավելի վաղը, ի պատասխան Սիրիայի տարծքից դեպի Իսրայել արձակված կրակին, Իսրայելի ՌՕՈւ-ն պատասխան գործողություններ էր իրականցրել, որից հետո Սիրիայի բանակի կենտրոնական հրամանատարությունը հայտնել էր, որ Սիրիայի զինված ուժերը խոցել են Իսրայելի ՌՕՈւ մեկ ինքնաթիռ և մեկ անօդաչու թռչող սարք, սակայն Իսրայելի պաշտպանության բանակը հերքեց ինքնաթիռի խոցվելու մասին լուրը։
Հավելենք՝ սեպտեմբերի 14-ին ԱՄՆ-ի և Իսրայելի միջև ստորագրված Իսրայելին 10 տարվա ընթացքում 38 մլրդ ԱՄՆ դոլարի (տարեկան 3,8 միլիարդ) ռազմական օգնության տրամադրման համաձայնագիրի շրջանակներում տարեկան 500 մլն դոլար ուղղվելու է Իսրայելի հակահրթիռային պաշտպանության ֆինանսավորմանը, որի մաս է կազմում նաև Iron Dome համակարգը:
Նշենք, որ իսրայելական Iron Dome հակահրթիռային պաշտպանության համակարգը նախատեսված է հակառակորդի չկառավարվող հրթիռների հայտնաբերման ու ոչնչացման համար: Համակարգը հայտնաբերում ու սեփական հրթիռներով ոչնչացնում է հակառակորդի՝ 4-ից 70 կմ հեռավորությունից արձակված չկառավարվող հրթիռներն ու արկերը: Համակարգը զինված է 90 կգ զանգվածով և 1,6 մ տրամագծով հրթիռներով, որոնց վրա էլ տեղադվրած են նշանառման հրթիռները։