Մեկամյա դասընթացից հետո բուհերի շրջանավարտները կարող են ԶՈւ-ում ծառայել որպես սպա

Պարտադիր ժամկետային ծառայության զորակոչի ենթակա, բուհերի շրջանավարտ քաղաքացիները կարող են անցնել ՀՀ ՊՆ մեկամյա սպայական դասընթացները և դրանից հետո 2 տարի որպես սպա ծառայել զինված ուժերում՝ որպես ժամկետային ծառայության այլընտրանք:

Այս մասին ՀՀ ՊՆ «Զինուժ» հեռուստածրագրի հետ հարցազրույցում հայտնել է ՀՀ ՊՆ կադրերի և ռազմական կրթության վարչության, ՀՀ և արտասահմանյան երկրների ուսումնական հաստատություններում կադրերի պատրաստման բաժնի պետ, գնդապետ Սուրեն Դավթյանը:

ՀՀ ՊՆ Վազգեն Սարգսյանի անվան ռազմական համալսարանի կուրսանտները

ՀՀ ՊՆ Վազգեն Սարգսյանի անվան ռազմական համալսարանի կուրսանտները

Նմանատիպ սպայական դասընթացները հայկական զինված ուժերում մեկնարկել են 2009 թվականից, սակայն առաջին անգամ կազմակերպվել են որպես վեցամսյա սպայական դասընթացներ:

«Առաջին ավարտական քննությունները ցույց տվեցին, որ 6 ամիսը բավարար ժամկետ չէ: Ինչից հետո՝ 2010 թվականից սկսված, կազմակերպվում են մեկամյա սպայական դասընթացներ:

Մինչ օրս մեր ունեցած փորձը ցույց է տալիս, որ մեկ տարին բարձրագույն կրթությամբ քաղաքացիների համար բավարար է, որ դառնան որակյալ մասնագետներ», — նշել է ՀՀ ՊՆ պաշտոնյան:

Ի սկզբանե այդ դասընթացները կազմակերպվել են միայն Վազգեն Սարգսյանի անվան ռազմական համալսարանում՝ մոտոհրաձիգ մասնագիտությամբ, այնուհետև ներդրվել են հրետանավորի մասնագիտությամբ մեկամյա դասընթացները:

Սպայական դասընթացին դիմելու համար նախատեսված փուլերին անդրադառնալով՝ գնդապետ Դավթյանը նշել է, որ ընտրությունը կատարվում է պարտադիր ժամկետային ծառայության զորակոչված այն քաղաքացիներից, ովքեր ունեն բարձրագույն կրթություն:

«Այսինքն երբ նրանք ավարտում են բուհը և զորակոչվում են Հայաստանի զինված ուժեր, մենք նրանց որպես այլընտրանք առաջարկում ենք, որ մեկ տարի ժամկետով գան սովորեն ռուհերում, որից հետո անցնեն ծառայության զինված ուժերում՝ երկու տարի ժամկետով», — նշել է պաշտոնյան:

Գնդապետի խոսքով՝ ի սկզբանե ուսումնառությունն ավարտելուց հետո սպաներն անցնում էին 5 տարի ծառայություն, որից հետո փոխվեց ժամկետը՝ 3 տարի, իսկ ներկայում՝ այս տարվանից, երկու տարի ժամկետով են ծառայելու զինված ուժերում:

Երկու տարվա ծառայությունից հետո այս սպաներն ազատ են և կարող են որոշել՝ ցանկանում են արդյոք շարունակել իրենց ծառայությունը, թե ցանկանում են իրենց գիտելիքներն ու ձեռք բերած փորձը օգտագործել այլ բնագավառում:

Գնդապետ Սուրեն Դավթյանը «Զինուժի» հետ հարցազրույցի ժամանակ

Գնդապետ Սուրեն Դավթյանը «Զինուժի» հետ հարցազրույցի ժամանակ

Բացի այդ, սպայական դասընթացի մասին որոշ մանրամասներ է հայտել նաև «Զինուժի» պատրաստած ռեպորտաժը, որից մասնավորապես հայտնի է դառնում, որ «շաբաթներ առաջ» կուրսանտները զինվորական երդում են տվել, և նրանց շարքում են եղել Հայաստանի տարբեր բուհեր ավարտած և մեկամյա սպայական դասընթացներում ներգրավված «ավելի քան երեք տասնյակ երիտասարդներ»:

Դասընթացներում շեշտը դրված է զինվորական մասնագիտական առարկաների ուսուցման վրա, որովհետև քաղաքացիական բուհերում նրանք արդեն յուրացրել են ռազմական համալսարանում դասավանդվող այլ առարկաները:

Կուրսանտների հետ նախապես անցկացվել են նորակոչիկների պատրաստության ծրագրով դասընթացներ: Նրանց հետ կնքվել են դասընթացին մասնակցելու մասին և պայմանագրային զինվորական ծառայության անցնելու մասին պայմանագրեր:

Ուսումնառության ավարտին կուրսանտներին կշնորհվի լեյտենանտի կոչում, և նրանք ստացած զինվորական մասնագիտությանը համապատասխան երկու տարով կանցնեն զինծառայության և վիճակահանությամբ ընտրած զորամասերում կզբաղեցնեն դասակի հրամանատարի պաշտոններ:

Ուսումնառության և ծառայության ընթացքում նրանք օգտվելու են նաև զինծառայողների համար ՀՀ օրենսդրությամբ սահմանված սոցիալական արտոնություններից:

Հարցազրույցը և ռեպորտաժը՝ տեսանյութում ստորև

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *