Օգոստոսի 17-ին Տաջիկստանում տեղակայված ռուսաստանյան 201-րդ ռազմաբազայի զինծառայողները զորավարժության ընթացքում ոչնչացրել են պայմանական զինված ահաբեկիչների քարավանը երկրի Կարշիտաու լեռնաշղթայի նախալեռներում: Այս մասին հայտնում է «ՌԻԱ Նովոստի» լրատվական գործակալությունը՝ հղում անելով ՌԴ ԶՈւ կենտրոնական ռազմական շրջանի մամուլի ծառայությանը:
ՌԴ ԶՈւ 2Ս1 «Գվոզդիկա» ինքնագնաց հաուբից
Կտրուկ փոխվող ուսումնամարտական իրադրության պայմաններում՝ քողարկված կրակային դիրքերում տեղակայված 2Ս1 «Գվոզդիկա» ինքնագնաց հաուբիցները կրակել են պայմանական հակառակորդի դիրքերի ուղղությամբ:
Պայմանական հակառակորդի կորդինատները հայտնաբերել և հրամանատարական կայան են փոխանցել 201-րդ ռազմաբազայի հետախուզական ստորաբաժանումները:
Կենտրոնական ռազմական շրջանի մամուլի ծառայության տեղեկություններով՝ կրակային պատրաստությունն իրականացվել է 201-րդ ռազմաբազայի հրթիռային ստորաբաժանումների ճամբարային հավաքների շրջանակներում, որոնք կձգվեն մինչև սեպտեմբերի կեսերը:
Ավելացնենք, որ Տաջիկստանը հարավում անմիջապես սահմանակից է Աֆղանստանին, ինչը մտահոգություն է առաջացնում, որ հարավից՝ Աֆղանստանից, այդ երկիր կարող են ներխուժել ինչպես «Թալիբանի», այնպես էլ՝ «Իսլամական պետության» զինյալները:
Այս պատճառով Տաջիկստանում հակաահաբեկչական զորավարժությունները պարբերական բնույթ են կրում, իսկ 2015-ի մայիսին ՀԱՊԿ արագ արձագանքման հավաքական ուժերն անցկացրել են «Աֆղանստանից Տաջիկստան ներխուժած» պայմանական զինված խմբավորման ոչնչացման սցենարով զորավարժություն, որին մասնակցել է նաև հայկական ստորաբաժանում :
ՀԱՊԿ արագ արձագանքման հավաքական ուժերի վարժանքները Տաջիկստանի «Խարբմայդոն» զորավարժարանում (արխիվ)
Ռուսաստանյան 201-րդ ռազմաբազան ստեղծվել է Ռուսաստանի և Տաջիկստանի միջև 2004-ին կնքված համաձայանգրով՝ 201-րդ մոտոհրաձգային դիվիզիայի հիմքի վրա։ 2012-ի բանակցություններից հետո երկու պետությունները ստորագրել են համաձայնագիր, որով ՌԴ ռազմաբազան Տաջիկստանում կշարունակի մնալ մինչև 2042 թվականը։ Ռազմաբազայում ծառայում է ՌԴ զինված ուժերի շուրջ 7,5 հազար զինծառայող։