Այսօր՝ օգոստոսի 15-ին, ՌԴ ՌԾՈւ Կասպյան նավատորմիղը, հրթիռային, հրետանային և փոքր հրթիռային նավերի մասնակցությամբ, ստուգարքային վարժանքներ է սկսել, որին ներգրավված է նաև հարավային ռազմական շրջանի ավիացիան: Այս մասին հայտնում է ՌԴ ՊՆ կայքը:
Նավերն արդեն դուրս են եկել Աստրախանում գտնվող «Զատոն Զոլոտոյ» բազայից և սկսել ստուգարքային վարժանքները Կասպից ծովի ջրային տարածքներում: Զորավարժության փուլերից մեկում բեմադրվելու է ծովային մարտ պայմանական հակառակորդի նավերի հետ, որին կներգրավվի նաև ՌԴ ԶՈւ հարավային ռազմական շրջանի ավիացիան:
Բացի այդ, ՌԴ ԶՈւ նավերի անձնակազմները տարբեր տիպի հրթիռային և հրետանային հարվածներ են հասցնելու ծովային, ցամաքային և օդային թիրախներին:
Ընդհանուր առմամբ վարժություններին ներգրավված են նավատորմիղի ավելի քան 20 նավեր և կատերներ, այդ թվում՝ «Թաթարստան» և «Դաղստան» հրթիռային նավերը, փոքր հրթիռային և հրետանային «Գրադ Սվիյաժսկ», «Վելիկիյ Ուստյուգ», «Վոլգոդոնսկ» և «Մախաչկալա» նավերը, սակրավորային, ինչպես նաև մատակարարումների համար նախատեսված նավեր:
Հիշեցնենք՝ օգոստոսի սկզբին հայտնի էր դարձել, որ օգոստոսի 15–20-ը Կասպյան նավատորմիղի նավերը հրթիռահրետանային ուժերի ներգրավմամբ կրակային զորավարժություն են անցկացնելու Կասպից ծովի հարավարևմտյան շրջանում:
Հիշեցնենք, որ հենց Կասպյան նավատորմիղի «Դաղստան», «Գրադ Սվիյաժսկ» , «Ուգլիչ» , «Վելիկիյ Ուստյուգ» ռազմանավերն էին 2015-ի հոկտեմբերին 26 հրթիռ արձակել Սիրիայում «Իսլամական պետություն» ահաբեկչական խմբավորման դիրքերին՝ 11 թիրախի ուղղությամբ։
Pingback: Ռազմաշաբաթ. Տարածաշրջան. 14-20 օգոստոսի, 2016 | Ռազմ.info
Pingback: ՌԴ Կասպյան նավատորմիղն ավարտել է խոշոր զորավարժությունը | Ռազմ.info