Այսօր՝ հունիսի 17-ին, Վրաստանում ավարտվել է զինված ուժերի ինժեներական բրիգադի զինծառայողների համար անցկացված 3 շաբաթյա դասընթացը, որին մասնակցել է 10 զինծառայող: Դասընթացն անցկացրել են Լյուքսեմբուրգի զինված ուժերի մասնագետները: Այս մասին տեղեկացնում է Վրաստանի պաշտպանության նախարարության մամուլի ծառայությունը:
Ինչպես նշվում է հաղորդագրության մեջ, դասընթացն անցկացվել է «Վրաստան-4» նախագծի շրջանակներում: Վերապատրաստման առաջին շաբաթվա ընթացքում զինծառայողներն անցել են տեսական դասընթաց, մյուս 2 շաբաթվա ընթացքում զինծառայողները գործնական պարապմունքներ են արել Վազիանի զորավարժարանում:
Դասընթացի ավարտին ներկա են եղել Վրաստանի զինված ուժերի գլխավոր շտաբի պետի տեղակալ, գնդապետ Նիկոլոզ Աղլաձեն, ինժեներական բրիգադի հրամանատար, գնդապետ Գոչա Շավգուլիձեն, Վրաստանի ԶՈւ ԳՇ զորավարժությունների և ռազմական կրթության հրամանատար, գնդապետ Մալխազ Մակարաձեն:
Հիշեցնենք, որ ՆԱՏՕ-ի «Գործընկերություն հանուն խաղաղություն» ծրագրի (NATO Partnership for Peace — PfP) շրջանակներում անցկացված դասընթացը մեկնարկել էր մայիսի 30-ին: