Մայիսի 19-ին ՆԱՏՕ-ի անդամ պետությունների արտգործնախարարները ստորագրել են Դաշինքին Մոնտենեգրոյի ասոցացման արձանագրությունը (Montenegro’s Accession Protocol), հայտնում է ՆԱՏՕ-ի պաշտոնական կայքը:
Փաստաթղթով երկիրը կդառնա ՆԱՏՕ-ի «հրավիրված» անդամ և կկարողանա ներկա լինել ՆԱՏՕ-ի բոլոր հանդիպումներին, այդ թվում՝ հուլիսին կայանալիք Վարշավայի գագաթաժողովին, սակայն որպես դիտորդ։
Որպեսզի Մոնտենեգրոն դառնա Դաշինքի լիիրավ անդամ, այս արձանագրությունը պիտի վավերացնեն ՆԱՏՕ-ի անդամ 28 երկրների խորհրդարանները: Նախատեսվում է, որ խորհրդարանների հաստատման գործընթացը կավարտվի հաջորդ տարվա գարնանը։
Մոնտենեգրոյի Դաշինքին անդամակցությանը պատրաստելու գործընթացը սկսվել է 2009 թվականից, երբ այդ երկրին 2009 թվականին հրավիրեցին միանալ ՆԱՏՕ-ին անդամակցության գործողությունների պլանին (MAP- Membership Action Plan )։
Իսկ անդամակցության հարցը հաստատվել է 2015 թվականի դեկտեմբերի 1-2-ը Բրյուսելում Դաշինքի անդամ պետությունների արտգործնախարարների մակարդակով հանդիպմանը։ Հանդիպման ժամանակ Մոնտենեգրոյին հրավիրել են Դաշինքի կազմ։
Ինչ վերաբերում է Վարշավայի գագաթաժողովին, ապա այն շատ կարևոր և սպասված է մասնավորապես ՆԱՏՕ-ի անդամ դառնալ ցանկացող Վրաստանի համար։ Հենց այս գագաթաժողովի ժամանակ կքննարկվեն Վրաստանի ձեռքբերումները, թերացումները, 2014 թվականի Ուելսի գագաթաժողովի ժամանակ տրված համագործակցույթյան փաթեթի կետերի կատարումը։
Թեև Վրաստանում սպասելիքները բավական շատ են առաջիկա գագաթաժողովից, այնուամենայնիվ, վերջին մի քանի ամսվա, ինչպես նաև ավելի վաղ ՆԱՏՕ-ի ռազմաքաղաքական ղեկավարության հայտարարություններն այդքան էլ հուսադրող չեն, թե Վրաստանը Վարշավայում հնարավոր է ստանա ՆԱՏՕ-ին անդամակցության գործողությունների պլան (MAP- Membership Action Plan ), առավել ևս՝ անդամակցություն։
Վրաստանի ռազմաքաղաքական ղեկավարությունն իր հերթին, հասարակության հիասթափությունը, մանավանդ խորհրդարանական ընտրություններից առաջ մեղմելու համար սկսել է հայտարարել, որ Վրաստանն առաջիկա գագաթաժողովում չի պահանջելու MAP, այլ դնելու է հետագայում միայն անդամակցության հարցը։
Ըստ Վրաստանի պաշտպանության նախարարի ավելի վաղ հայտարարության՝ MAP-ը Վրաստանի համար անցյալ է։
Տեղեկանք ըստ ՆԱՏՕ-ի պաշտոնական կայքի
MAP-ը հաստատվել է 1999 թվականի ապրիլին ՆԱՏՕ-ի գագաթնաժողովի ժամանակ որպես Դաշինքի և ՆԱՏՕ-ի անդամ դառնալ ցանկացող երկրների միջև համագործակցության ձևաչափ։ MAP-ը պահանջարկների ցուցակ է, որն անհրաժեշտ է կատարել մինչև ՆԱՏՕ-ի լիիրավ անդամ դառնալը։ Չնայած այդ պահանջների կատարումը դեռ չի նշանակում, որ երկիրը կարող է ավտոմատ մտնել ՆԱՏՕ։ Այն ընդամենը ևս մեկ քայլ է, որը մոտեցնում է հնարավոր անդամակցությանը երկրին։