Ապրիլի 27-ին Հայաստանի Հանրապետության պաշտպանության նախարար Սեյրան Օհանյանը Մոսկվայում անցկացվող անվտանգության հարցերով ամեանամյա միջազգային համաժողովի ընթացքում հանդիպել է Իրանի պաշտպանության և զինված ուժերի աջակցման նախարար Հոսեին Դեհղանի հետ: Այս մասին այսօր՝ ապրիլի 27-ին, հայտնում է ՊՆ տեղեկատվության վարչությունը։
Ինչպես նշվում է հաղորդագրության մեջ, կողմերը մտահոգություն են հայտնել հայ-ադրբեջանական ուժերի շփման գծում իրավիճակի սրման կապակցությամբ և կարևորել լարվածության թուլացման ու փոխվստահության մթնոլորտի հաստատման անհրաժեշտությունը: Երկուստեք նշվել է, որ ապրիլյան քառօրյա պատերազմի արդյունքները ևս մեկ անգամ ապացուցեցին արցախյան հակամարտության ռազմական լուծման անհնարինությունը:
Հանդիպման ընթացքում քննարկվել են նաև երկու երկրների պաշտպանական գերատեսչությունների միջև համագործակցության առկա վիճակն ու հետագա զարգացման հեռանկարներին առնչվող հարցերը:
Pingback: ՀՀ պաշտպանության նախարարն ընդունել է Իրանի դեպանին | Ռազմ.info