Այսօր՝ փետրվարի 16-ին Արցախի Մատաղիս ավանում հանդիսավոր պայմաններում շահագործման է հանձնվել Պաշտպանության բանակի զինծառայողների համար կառուցված բազմաբնակարան բնակելի շենք: Սպաների բնակարանամուտի արարողությանը մասնակցել է նաև Արցախի ղեկավար Բակո Սահակյանը, հայտնում է Արցախի ղեկավարի կայքը:
Այնուհետ Բակո Սահակյանը Մարտակերտ քաղաքում մասնակցել է նաև զինծառայողների համար ևս մեկ բազմաբնակարան շենքի հիմնարկեքի արարողությանը:
[Լրացում] Մատաղիսում շահագործման հանձնված շենքն ունի 24 բնակարան: Իսկ Մարտակերտում կառուցվելու է նոր բնակելի թաղամաս, որի 4 շենքերից ամեն մեկն ունենալու է 32 բնակարան: Այս մասին հայտնել է Արցախի հանրային հեռուստատեսությունը:
Նշենք, որ նախորդ տարի՝ 2015թ. նոյեմբերին, ևս 176 բնակարան սպաներին է հանձնվել Ստեփանակերտում: Բնակարանամուտի հանդիսավոր արարողությանը մասնակցել է ՀՀ նախագահ Սերժ Սարգսյանը:
Բացի այդ, Արցախում և մասնավորապես Մարտունի քաղաքում կառուցվող ևս մեկ բազմաբնակարան շենքի բնակարանների մի մասը նույնպես հատկացվելու է ՊԲ սպաներին: Շենքի շինարարությունը նախատեսված էր ավարտել 2015-ի վերջին:
Պաշտպանության բանակի զինծառայողների համար նախատեսված ևս երկու բնակելի շենք կառուցվում է Արցախի Ճարտար քաղաքում: Ընդհանուր 24 բնակարան ունեցող երկու շենքը նախատեսվում է շահագործման հանձնել 2017-ին:
Բացի այդ, 2015թ. ընթացքում բնակարաններ են տրամադրվել նաև ՀՀ ՊՆ ՀՕՊ զորամասերից մեկի և 5-րդ ԲԿ զորամասերից մեկի զինծառայողներին, ինչպես նաև Ագարակում ծառայող ՀՀ ԶՈւ զինծառայողներին: Տարեվերջին՝ դեկտեմբերի 26-ին էլ ՀՀ ԶՈւ սպաների համար նախատեսված ևս մեկ բնակելի շենք շահագործման է հանձնվել Վանաձորում:
2015 թվականն ամփոփելով՝ ՀՀ ՊՆ կապիտալ շինարարության և զորքերի բնակավորման վարչության պետ Աշոտ Գրիգորյանը դեկտեմբերին ՀՀ ՊՆ «Հայ Զինվոր» պաշտոնաթերթին հայտնել է, որ ընդհանուր առմամբ տարվա ընթացքում Հայաստանի պաշտպանության նախարարությունը շահագործման է հանձնել 8 բնակելի շենք՝ ընդհանուր 330 բնակարանով:
Պաշտոնյայի խոսքով՝ նախատեսվում է 2016 թվականին նոր բնակելի շենքեր կառուցել Երևանում, Գյումրիում, Վայքում, Սիսիանում, Գորիսում, Ագարակում, Իջևանում, Մեհրաբում և Շահումյանում: Եվ բացի այդ, մեկական շենք էլ կվերակառուցվի ու կվերանորոգվի Կապանում և Վանաձորում:
Բնակարանները պատրաստ կլինեն 2017 թվականին: Այդ տարի պաշտպանության նախարարությունը նախատեսում է ՀՀ ԶՈւ սպաներին հանձնել 393 բնակարան:
Pingback: Արցախում նոր բնակարաններ կկառուցվեն ՊԲ սպաների և ազատամարտիկների ընտանիքների համար | Ռազմ.info
Pingback: 2017-ին հայկական բանակի զինծառայողների համար կկառուցվի 10-ից ավելի բնակելի շենք | Ռազմ.info